Aqtóbede ardagerler men tyl eńbekkerlerine qandaı járdemaqy tólenedi

ASTANA. KAZINFORM — Qalalyq jáne aýdandyq máslıhattar sheshimimen oblysta 4 336 adamǵa áleýmettik tólem qarastyrylǵan, dep habarlaıdy Aqtóbe oblysynyń ákimdigi.

Aqtóbe oblysynda Jeńistiń 80 jyldyǵyna oraı Uly Otan soǵysynyń qatysýshylary men múgedekterine, olarǵa teńestirilgen tulǵalarǵa, sonymen qatar soǵys jyldarynda keminde 6 aı eńbek etken tyl eńbekkerlerine jergilikti bıýdjetten birjolǵy materıaldyq kómek bólindi.

— Qalalyq jáne aýdandyq máslıhattardyń sheshimimen oblysta 4 336 adamǵa jalpy somasy 1 076,8 mln teńge tólem qarastyrylǵan. Atap aıtqanda, tyl eńbekkerleri 153 348 teńgeden alady. Oblystaǵy jalǵyz Uly Otan soǵysynyń ardageri Hromtaý aýdanynda turatyn Vasılıı Ivanovıch Gretskııge 5 mln teńge tólenedi, — delingen habarlamada.

1 724 adamǵa 353 880 teńge kólemindegi birjolǵy járdemaqy qarastyrylǵan. Olar — soǵysqa qatysqandar men múgedekter, sonymen qatar, soǵys jyldarynda jaraqat alyp qaıtys bolǵan, kontýzııaǵa nemese aýrýǵa ushyraǵan áskerılerdiń otbasylary. Sondaı-aq, 991 adamǵa, olardyń ishinde soǵys kezinde alǵan jaraqat saldarynan múgedek bolǵandardyń jesirlerine jáne 2 019 tyl eńbekkerlerine 153 348 teńgeden tóleý qarastyrylǵan.

Eske salsaq, Uly Jeńistiń 80 jyldyǵyna arnalǵan áskerı paradqa el óńirlerinen soǵys ardagerleri qatysty.