Aqtóbede aralas jekpe-jekten Alash Pride týrnıri ótti
AQTÓBE. QazAqparat - Aqtóbede Alash Pride klýbynyń aralas jekpe-jek týrnıri ótti, dep habarlaıdy QazAqparat.
Oblys ákiminiń baspasóz qyzmeti taratqan málimetke sensek, Aqtóbede «Qonys» sport saraıynda «Alash Pride» klýbynyń aralas jekpe-jek týrnıri ótken.
Sharaǵa oblys ákimi Ońdasyn Orazalın qatysty. Óńir basshysy qatysýshylarmen amandasyp, rıngte sáttilik tiledi.
«Memleket basshysy Qasym-Jomart Toqaev sportqa memleket únemi qamqorlyq kórsetý qajettigin atap kórsetti. Memleket basshysynyń tapsyrmasyn oryndaý maqsatynda Aqtóbe oblysynda sport jáne dene shynyqtyrýdy damytý baǵytynda birqatar jumystar atqarylyp keledi. Aıta ketetin bolsaq, qalamyzda naýryz aıynyń basynda gir sportynan respýblıka birinshiligi ótip, jerlesimiz Evgenıı Goncharov elimizdiń 30 dúrkin chempıony atandy. Búgin taǵy bir qyzyq saıys bastaldy. Osyndaı nátıjeler bizdiń óńirimizdiń dene shynyqtyrý jáne sport salasynyń damýyna jańa qarqyn beretinine senemin jáne jastarymyz shyńdalyp, salaýatty urpaǵymyz kóp bolýyna septigin tıgizedi dep oılaımyn»,- dedi oblys ákimi.
Jalpy týrnırde toǵyz jekpe-jek uıymdastyrylyp, oǵan Qazaqstan, Reseı, Qyrǵyzstan jáne Ózbekstan elderinen sportshylar qatysty.
Aqtóbe qalasynan Nurbek Qabdrahmanov, Aıdyn Tólepbaev jáne Elaman Otarov óner kórsetti.
Jarys kezinde oblys ákimi jýyrda MMA-dan úsh dúrkin álem chempıony, aralas jekpe-jek boıynsha álem jáne Azııa chempıony Baǵdat Jubanyshqa úsh bólmeli páter kiltin tabys etti.
