Aqtóbede ár ulttyń salt-dástúrine negizdelgen etnoaýyl salynady
AQTÓBE. QazAqparat -Aqtóbedegi ózge ult ókilderi ulttyq taǵamyn nasıhattap, qonaq kútetin aýyldyń qurylysyna qatysa alady. Bul týraly búgin «Alǵysym sheksiz ózińe...» merekelik sharasy kezinde belgili boldy, dep habarlaıdy QazAqparat tilshisi.
Aqtóbede Alǵys aıtý kúnine oraı merekelik shara ótti. Ótken jyly boı kótergen Qazaq halqyna myń alǵys stellasy mańyna qala turǵyndary jınalyp, arnaıy kontsertti tamashalady. Óńir turǵyndaryn oblys ákimi Berdibek Saparbaev ta quttyqtady.
«Biz kóp ultty memleketpiz. Bizdiń memleketimizdiń saıasaty - ulttar arasyndaǵy tatýlyq, dostyq. Qazaq halqy ár ýaqytta bir úzim nandy bólip jegen, ózge adamdardyń ulty, tili, dinine qaramaı kómek bergen. Ótken ǵasyrda Qazaqstanǵa qansha ult kelgenin, qazaqtar ózderiniń jaǵdaıynyń nasharlyǵyna qaramastan sol adamdarǵa pana, qamqorshy bolyp, alǵysyna bólengenin bári biledi. Ósip kele jatqan urpaq osylardy eshýaqytta umytpaı, ónege alýy kerek. Alǵys adamǵa qosymsha kúsh, qýat, belsendilik, bolashaqqa degen senimdilik beredi. Jastar, árýaqytta alǵys alyp, ómir súrýi tıis»,- dedi óńir basshysy.
Keıin aqtóbelik oqýshylar ózderi daıyndaǵan arnaıy paraqshany taratty. Ata-anasyna, ustazyna, dostaryna alǵys aıtqan oqýshylar qala turǵyndaryna jyly lebizin arnady. Sonymen qatar, búgin Qazaq halqyna myń alǵys stellasy mańynda etnoaýyldyń qurylysy bastalatyny belgili boldy. Bul jerde ár ult salt-dástúrin jańǵyrtyp, ulttyq taǵamdaryn ázirleıdi, qonaq kútedi. Ulttyq taǵamdar daıyndaıtyn demalys ornyn salý ıdeıasyn óńir basshysy Berdibek Saparbaev kóterip, birneshe kásipker qoldaý tanytty. Aldaǵy ýaqytta qazaqtyń úıin kásipker, metsenat Nurlan Saǵynalın salady. Ol óńirde et klasterin damytyp, mal sharýashylyǵyn bir izge qoıǵan kásipker. Sonymen qatar, tatar-bashqurt etnomádenı birlestiginiń jetekshisi Elvıra Habıbýllına, koreı etnomádenı birlestiginiń ókili Elena Kogaı, «Ýrartý» armıan birlestiginiń tóraǵasy Garık Terterıan etnoaýylǵa bir-bir demalys ornyn salady. Bul qatar áli de tolyqtyrylady.
