Aqtóbede ár sala qyzmetkeriniń óz saıabaǵy bolady
AQTÓBE. QazAqparat - Aqtóbede mádenıet, densaýlyq, sport sııaqty ár salanyń óz saıabaǵy bar. Bıyl barlyǵy 34 demalys orny qala halqynyń ıgiligine paıdalanýǵa beriledi, dep habarlaıdy QazAqparat tilshisi.
Aqtóbe qalasyndaǵy jańa yqsham aýdandarǵa saıabaq salynyp, qala ishindegi qaraýsyz qalǵan demalys oryndary qaıta qalpyna keltirilip jatyr. Qazir óńirdegi ár sala qyzmetkerleriniń óz mindetine alǵan saıabaǵy bar. Memlekettik mekeme qyzmetkerleri aǵash otyrǵyzý, tazartý jumystaryn júrgizip jatyr. Máselen, qalada «Mádenıet», «Densaýlyq» saıabaqtary boı kóterdi. Tipti oblystyq sot, Іshki ister departamentiniń óz demalys oryndary bar.
Qalanyń ortalyǵyndaǵy Abaı dańǵylynda ornalasqan saıabaq qaıta jańartylyp, jaryqtandyrý jumysy júrgizilip jatyr. Munda 800 dekoratıvti aǵash otyrǵyzylady. Jaıaý júrginshiler joly tóselep, oryndyqtar jańarady. Qurylys, aǵash egý, saıabaqty qalpyna keltirý jumystarymen oblys ákimi Berdibek Saparbaev tanysyp, birqatar tapsyrmalar berdi.
«Bul jumystar sapaly júrgizilýi tıis. Sondyqtan qala ákimdigi kúndelikti tekserip turýǵa mindetti. Qala turǵyndary men qonaqtar úshin osyndaı jasyl jelekke oranǵan saıabaqtardy kóbeıtýimiz kerek»,- dedi óńir basshysy.
Aıta keteıik, bıyl qalaǵa 20 myńnan astam aǵash egildi. Al kóktemde qaladaǵy halyqaralyq áýejaı aýmaǵyna 1 mıllıon túp kóshet otyrǵyzylǵan bolatyn.
