Aqtóbede anasynyń kesirinen kózi kórmeı qalǵan sábıge donorlyq jolmen ota jasaldy
AQTÓBE. QazAqparat - Aqtóbe qalasynyń turǵyny balasyna kóńil aýdarmaı, juqpaly aýrýy asqynyp ketti. Eki kózi soqyr bolyp qalǵan balaǵa ota jasalyp, ol jaryqty kóre bastady, dep habarlaıdy QazAqparat tilshisi.
Aqtóbe qalasynyń turǵyny ishimdikke salynyp, balasyn qaraýsyz qaldyrǵan. Salqyn tıip, ózi jasaýrap, jaraǵa aınalǵan soń sábıdiń qos janary jaryqty sezbeı qaldy. Polıtsııa qyzmetkerleri balany «Úmit» sábıler úıine tapsyryp, dárigerler oǵan em jolyn izdedi. Jan-jaqqa habar bergen dárigerler 1 jastan asqan Sashany Almatydaǵy kóz aýrýlarynyń ulttyq ınstıtýtyna jatqyzdy. Dárigerler balanyń móldir qabyrshyǵyn aýystyryp berdi. Donorlyq ota sátti aıaqtalyp, qazir bala jaryqty seze bastady.
«Kózdiń móldir qabyǵy donorlyq jolmen almastyryldy. Jedel qılymdap, der kezinde ota jasalǵan soń bala saýyǵyp keledi. Buryn jaryqty múlde sezbeıtin edi. Qazir jaryqty biledi, áserin de ashyq kórsetedi»,- dedi «Úmit» sábıler úıiniń bólim meńgerýshisi Nurgúl Sarmanova.
Aıta keteıik, kishkentaı Sashanyń soqyr bolyp qalýyna sebepker bolǵan anasy ata-analyq quqyǵynan aıyryldy. Al Aleksandr Davletalınovtyń aǵasy jáne eki apasy bar. Olar Aqtóbedegi kámelet jasqa tolmaǵandardy beıimdeý ortalyǵynda jatyr. Keıin olar balalar úıine jiberiledi. Al kishkentaı Sasha «Úmit» sábıler úıinde 3 jasqa deıin bolyp, túrli em qabyldaıdy. Sebebi, balanyń tili áli shyqpaǵan, júrý qabileti de kesh damyp keledi.
