Aqtóbede anasyn óltirdi degen oqýshy qyzdyń isi sotqa joldandy

AQTÓBE. QazAqparat - Aqtóbe qalasy Almaty aýdandyq prokýratýrasy anasyn óltirgen oqýshy men onyń janynda bolǵan jigitke qatysty isti tergep, sotqa jiberdi, dep habarlaıdy QazAqparat tilshisi.

«Tergeý kezinde aıyptalýshylardyń birneshe kún ótken soń ǵana qylmys týraly habarlaǵany belgili boldy. Aıyptaý aktisi kezinde olarǵa qatysty bap ózgertildi. Іs Qylmystyq kodekstiń 99-baby 2-tarmaǵy, ıaǵnı, top bolyp jasaǵan qylmysy úshin sotqa joldandy. Іs Aqtóbe oblystyq qylmystyq ister jónindegi mamandandyrylǵan aýdanaralyq sotqa jiberildi»,- dep jazdy Aqtóbe qalasy Almaty aýdandyq prokýrory Jasulan Dáýlembaev.

Eger olardyń kinási dáleldense 15 jyldan 20 jylǵa deıin bas bostandyǵynan aıyrylýy múmkin.
Aıta ketsek, oqıǵa mamyr aıynyń basynda tirkeldi. Aqtóbe oblystyq bilim basqarmasy basshysynyń orynbasary Nurgúl Bertileýova kúdikti qyzdyń tolyq emes otbasynda tárbıelenip jatqanyn aıtty.

«Anasy vahtalyq ádispen saýynshy bolyp jumys istegen. Bala beıádep árekettermen kózge túspegen. Biraq anasy birneshe ret balasyn qaraýsyz qaldyryp, soǵan baılanysty kámeletke tolmaǵandardyń isteri jónindegi komıssııa otyrysyna shaqyrylǵan, eskertý jasalǵan. Bala salmaqty, artyq is-áreketteri buǵan deıin baıqalmaǵan. Іshki ister organdarynyń esebinde bolmaǵan. Tek saǵat 23:00-den keıin kóshede júrip, osy talapty buzǵany úshin birneshe ret eskertý alǵan. Janynda dos balasy bolǵan. Ol kámelettik jasqa tolǵan jigit. Qaladaǵy kolledjderdiń biriniń stýdenti»,- dedi oblystyq bilim basqarmasy basshysynyń orynbasary Nurgúl Bertileýova.