Aqtóbede anasy men balasyn óltirgen kúdikti qamaldy
Aqtóbe oblystyq soty baspasóz qyzmetiniń habarlaýynsha, kúdiktige qatysty «qamaýda ustaý» týraly bultartpaý túrindegi sharasy qabyldanǵan. Eki aıǵa sanktsııa berilip, ol 31 mamyrǵa deıin jalǵasady.
Eske salsaq, 29 naýryz kúni saǵat 5:30-da «102» telefonyna Aqtóbe qalasyndaǵy turǵyn úıdegi páterlerdiń birinen eki máıit tabylǵany týraly habarlaǵan. Jedel tergeý toby páterden 35 jastaǵy áıeldiń jáne 16 jastaǵy ulynyń zorlyq belgileri bar máıitterin tapty. Sonymen qatar, qaza tapqan áıeldiń 13 jastaǵy qyzy pyshaq jaraqatymen balalar aýrýhanasynyń jańsaqtaý bólimine jatqyzyldy. Osy fakti boıynsha Qylmystyq kodekstiń «Kisi óltirý» baby boıynsha sotqa deıingi tergeý júrdi.
Al jaralanyp, aman qalǵan 13 jastaǵy qyzǵa ota jasaldy. Moıyn tusyndaǵy qan tamyry, keńirdegi kesilip-tesilgen. Qazirgi kezde jábirlenýshi jansaqtaý bóliminen palataǵa aýystyryldy.
Aıta keteıik, ótken aptada óńirde 153 qylmys tirkelgen. Onyń 50-den astamy urlyq, 40-tan astamy alaıaqtyń isi. Buryn jasalǵan 12 qylmys ashyldy. Al jol-kólik oqıǵasy kezinde keshe 2 adam mert bolyp, úsheýi aýrýhanaǵa tústi.
