Aqtóbede anasy men balasy koronavırýs ınfektsııasyn juqtyrdy
AQTÓBE. QazAqparat – Aqtóbeniń Mártók aýdanynda anasy men balasynan koronavırýs ınfektsııasy anyqtaldy. Qazir olar em qabyldap jatyr, dep habarlaıdy QazAqparat tilshisi.
Nur – Sultan qalasynyń ýaqytymen saǵat 17:25-de Aqtóbe oblysynda taǵy eki adamnan indet anyqtalǵan bolatyn. Olar qazir aýdanda em qabyldap jatyr.
«Infektsııalyq statsıonardaǵy arnaıy boks palatada barlyǵy 22 naýqas em qabyldap jatyr. Bireýiniń jaǵdaıy aýyr. Júrek aýrýy, qant dıabeti sekildi sozylmaly derti bolǵan soń keshe tynys alýy nasharlaǵan edi. Qazir emniń nátıjesinde jaǵdaıy turaqtaldy. Bir naýqastyń jaǵdaıy ortasha aýyr. Sońǵy tirkelgen derek boıynsha, bir otbasynda anasy men balasy indetke shaldyqty. Aqtóbe qalasynyń turǵyny 12 sáýir kúni Mártók aýdanyna qonaqqa barǵan. Nátıjesinde áıel men onyń 1 jastaǵy balasynan vırýs tabyldy. Sondyqtan shekteýlerdi eskerip, oqshaýlanǵan jón. Esh qıyndyǵy joq, úıde otyr, eshkimge barma, eshkimdi shaqyrma», - dedi oblystyq densaýlyq saqtaý basqarmasynyń basshysy Áset Qalıev jergilikti arnadaǵy tikeleı efırde.
Aıta keteıik, Aqtóbedegi ınfektsııalyq, provızorlyq, karantındik gospıtalde 397 naýqas emdelip jatsa, 1800-den astam adam úıdegi karantınde.
