Aqtóbede anasyn óltirip, ájesin jaraqattaǵan oqýshy isi qysqartyldy
AQTÓBE. KAZINFORM - Jasóspirim oblystyq psıhıkalyq densaýlyq saqtaý mekemesinde em qabyldap jatyr. Sot májbúrli emdi jalǵastyrý týraly qaýly shyǵardy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda kámeletke tolmaǵannyń isi boıynsha sot qaýlysy shyqty.
- Qylmystyq kodekstiń 99-baby 1-bóligi, 24-baby 3-bóligi jáne 99-baby 2-bóligi 1-tarmaǵymen kózdelgen quqyq buzýshylyqty esi durys emes kúıinde jasaǵan sottalýshy qylmystyq jaýaptylyqtan bosatylsyn. Qylmystyq kodekstiń 93-baby 1-bóligi 4-tarmaǵyna sáıkes ıntensıvti baıqaıtyn mamandandyrylǵan úlgidegi psıhıatrııalyq statsıonarda májbúrlep emdeý taǵaıyndalsyn. Psıhıkalyq kómek kórsetetin arnaýly medıtsınalyq uıymǵa ornalastyrý túrindegi qaýipsizdik sharasy ózgerissiz qaldyrylsyn. Sot saraptamalaryna jumsalǵan 1,1 mln teńge memleket esebinen qabyldansyn,- dedi sýdıa Altynbek Sabyrov.
Іs materıalyna súıensek, oqýshynyń oqý úlgerimi nasharlap, anasymen arada kıkiljiń bolady. Jasóspirim anasynyń sózin kótere almaı as bólmedegi pyshaqty alyp, birneshe ret soqqy jasaǵan. Ony toqtatpaq bolǵan ájesin de jaralaǵan. Sot psıhologııalyq-psıhıatrııalyq saraptama qorytyndysy boıynsha jasóspirimge paranoıdty shızofrenııa dıagnozy qoıylǵan. Ol oblystyq psıhıkalyq densaýlyq saqtaý mekemesinde em qabyldap jatyr.
Eske salsaq, qylmys bolǵan ýaqytta oqýshy 16 jasta boldy. Tolyq otbasynda tárbıelendi jáne áleýmettik jaǵdaıy jaqsy dep baǵalandy.
