Aqtóbede anasy men balasyn kólik qaǵyp, 3 jasar qyz mert boldy
AQTÓBE. KAZINFORM – Oqıǵa Aqtóbe qalasynyń Ońtústik aınalma jolynda boldy. Áıel aýrýhanaǵa jetkizildi.
Ońtústik aınalma jolda bolǵan jol-kólik apatynan soń sotqa deıingi tergep-tekserý bastaldy.
– GAZel avtokóliginiń júrgizýshisi rettelmegen jaıaý júrginshiler ótkelinde eki jaıaý júrginshini, anasy men balany qaǵyp ketti. Jol-kólik oqıǵasy saldarynan 3 jasar qyz qaıtys bolyp, áıel medıtsınalyq mekemege jetkizildi. Adamnyń ólimine ákep soqqan jol qozǵalysy erejelerin buzý faktisi boıynsha sotqa deıingi tergep-tekserý bastaldy. Júrgizýshi ýaqytsha ustaý ızolıatoryna qamaldy, - dedi Aqtóbe qalalyq PB patrýldik polıtsııa batalony komandıriniń orynbasary Anýar Ibraev.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, 2021 jyly týǵan qyz aýrýhananyń jansaqtaý bólimine jetkizilgenimen, arada 35 mınýt ótkende kóz jumdy.
– Onyń 1992 jyly týǵan anasy oblystyq kópsalaly aýrýhanaǵa jetkizildi. Jaraqaty kóp, jaǵdaıy aýyr, - dedi Aqtóbe oblystyq densaýlyq saqtaý basqarmasy baspasóz qyzmeti.
Eske salsaq, tamyzda Aqtóbede bir otbasynyń 5 múshesi jol-kólik apaty kezinde kóz jumdy.
