Aqtóbede «Analarǵa taǵzym» ortalyǵy salynyp jatyr
ASTANA. QazAqparat - Aqtóbede «Analarǵa taǵzym» rýhanı-tárbıe berý ortalyǵy salynyp jatyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev aıtty, dep habarlaıdy QazAqparat.
«Kásipkerlerdiń qarajatynyń arqasynda «Analarǵa taǵzym» rýhanı-tárbıe berý ortalyǵy salynyp jatyr. Bul ortalyqtyń eń negizgi maqsaty - qazirgi urpaqqa ózimizdiń saltymyzǵa, dástúrimizge, tarıhymyzǵa saı tárbıe berý, Memleket basshysy aıtqandaı, Otanyn, ultyn súıýge tárbıeleý», - dedi ol.
Atalǵan ortalyq tarıhta batyrlyǵymen belgili bolǵan analarymyz ben apalarymyzdyń, qaryndastarymyzdyń ómirinen syr shertetin bolady. Sonymen qatar onda el jadynda qalǵan analar, olardyń erlik jáne eńbek joldary nasıhattalady. Bolashaqta urpaqqa ónege kórsetetin rýhanı tárbıe ortalyǵyna aınalady.
«Sondaı-aq kásipkerlerdiń qarajatyna «Neke saraıy» salynady. Aqtóbe qalasynda, aýdan ortalyqtarynda kóptegen jańa saıabaqtar salynady»,- dedi Berdibek Saparbaev.
