Aqtóbede ana men bala densaýlyǵyn saqtaý maqsatynda jańa pansıonat ashyldy
AQTÓBE. KAZINFORM — Qazaqstan Respýblıkasy Densaýlyq saqtaý mınıstrligi men Aqtóbe oblysy ákimdiginiń bastamasymen Aqtóbe oblystyq perınataldyq ortalyǵy bazasynda «Salaýatty ana» pansıonaty óz jumysyn bastady. Bul týraly vedomstvonyń baspasóz qyzmeti málim etti.
Pansıonattyń maqsaty – ana men balanyń densaýlyǵyn saqtaý, sondaı-aq oblystyń alys jáne qoljetimsiz aýdandarynda turatyn júkti áıelderde bolýy múmkin asqynýlardyń aldyn alý.
Mınıstrliktiń málimetinshe, pansıonatta 10 tósek-oryn qarastyrylǵan jáne júktilik kezinde asqyný qaýpi joǵary áıelderdi aldyn ala aýrýhanaǵa jatqyzýǵa arnalǵan. Áıelder bosaný ýaqytyna deıin táýlik boıy medıtsınalyq qyzmetkerlerdiń baqylaýynda bolady. Qyzmet tolyqtaı tegin kórsetiledi. Pansıonatta jatqan kezeńde júkti áıelderge kúndelikti keshendi medıtsınalyq tekserý júrgiziledi.
Eger qandaı da bir aýytqýlar, asqynýlar belgileri nemese bosaný protsesiniń bastalýy baıqalsa, naýqasqa jedel túrde bilikti arnaıy kómek kórsetiledi.
Pansıonattyń ashylýy mynalarǵa múmkindik beredi:
• ýaqtyly medıtsınalyq kómektiń qoljetimdiligin qamtamasyz etýge; • júktilik asqynýlaryn erte dıagnostıkalaýǵa;
• qajetti medıtsınalyq sheshimderdi jedel qabyldaýǵa;
• ana men bala ómirine qaýipti jaǵdaılardyń aldyn alýǵa.
Elimizde ana men bala densaýlyǵyn jaqsartý úshin qandaı jumys atqarylatynyn myna siltemeden oqyńyz.