Aqtóbede alypsatardan 9500 dana medıtsınalyq maska tárkilendi
AQTÓBE. QazAqparat – Aqtóbede 1 dana betperdeni 135 teńgege satyp alyp, 190 teńgege satpaq bolǵan turǵyn ustaldy. Odan 9500 dana medıtsınalyq maska tárkilendi, dep habarlaıdy QazAqparat tilshisi.
Aqtóbelik turǵyn medıtsınalyq betperdeni qymbatqa satqan adamnyń ústinen aryz túsirdi. Birden Qylmystyq kodekstiń «Zańsyz kásipkerlik» babymen is qozǵalyp, tergeý bastaldy.
«Tekrseý kezinde 27 jastaǵy qala turǵynynan 9500 dana betperde tárkilendi. Ol medıtsınalyq maskany qyzmet kórsetý saıty arqyly 1 danasyn 135 teńgege satyp alyp, 190 teńgege satýdy josparlaǵanyn aıtty. Quny – 1,8 mıllıon teńge. Osy derekke sáıkes ÁQBtK 463-babymen ákimshilik jaýapkershilikke tartylyp, qylmystyq is qysqartyldy. Tárkilengen betperde densaýlyq saqtaý basqarmasyna berildi», - dedi oblystyq ekonomıkalyq tergeý departamentiniń mamany Rústem Taıshıev.
