Aqtóbede «Altyn belgi» ıegerleri qyzyl kilemmen júrip ótti
AQTÓBE. QazAqparat - Búgin «Altyn belgi» alǵan 505 túlek marapattaldy, dep habarlaıdy QazAqparat tilshisi.
Tuńǵysh Prezıdent atyndaǵy saıabaq alańynda «Altyn belgi» ıegerlerin marapattaý sharasy ótti. Jas túlekterdi oblys ákimi quttyqtap,«Jas túlek» festıvaliniń baǵdarlamasy boıynsha halyqaralyq olımpıadalar men túrli baıqaýlarda jeńimpaz atanǵan úzdik 16 túlekti marapattady. Olardyń ishinde ata-anasynyń qamqorlyǵynsyz qalǵan eki altyn belgi ıegeriniń árqaısysyna 500 myń teńge, úsh «Úzdik attestat» ıegerine 300 myń teńgeniń sertıfıkatyn tabys etti.
«Halqymyzda mektep-keme, bilim-teńiz degen jaqsy sóz bar. Bilim aıdynynda eskegi myqty jan ǵana óz degenine jetpek. Bolashaqta máńgilik eldiń bir kirpishi bolyp qalanýlaryńyzǵa shyn júrekten tilektespin», - dedi aımaq basshysy Ońdasyn Orazalın.
Aıta keteıik, árbir «Altyn belgi» ıegerine oblys ákiminiń atynan quttyqtaý hat pen qolsaǵat berildi. Aqtóbe oblysynyń «100 jańa esim» jobasyna engen ardagerler, tanymal adamdar túlekterdi marapattaý sharasyna qatysty. Keıin jas túlekterdiń qurmetine arnaıy shaqyrylǵan jas ánshi Ábdijappar Álqoja ánnen shashý shashyp, kópshilikke merekelik kóńil-kúı syılady.
