Aqtóbede «Álııa» mıýzıkli sahnalandy
AQTÓBE. KAZINFORM — T. Ahtanov atyndaǵy oblystyq drama teatr ujymy «Álııa» mıýzıkli sahnalandy. Basty róldi stýdent somdady.
Búgin Aqtóbede Keńes Odaǵynyń batyry Álııa Moldaǵulovanyń týǵanyna 100 jyl tolýyna oraı «Álııa» mıýzıkli sahnalandy. Mýzykalyq qoıylym Qobda aýdany Bulaq aýylynan bastalyp, maıdan dalasynda jalǵasty. Bir jarym saǵatqa sozylǵan qoıylymda qazaqtyń batyr qyzynyń eli men jerine degen mahabatty, asqaq rýhy sýrettelgen. Basty róldi Ajar Járdenbekqyzy jáne Fatıma Berdibekova somdady.
— Kastıngke drama teatrdyń birneshe aktrısa, akteri qatysty. Sonyń ishinen búgin sahnaǵa shyqqa 20-ǵa jýyq adam tańdaldy. Álııa rólin somdaý maǵan buıyrypty. Men óte qýanyshtymyn. Álııa qaısar jan. Onyń rýhy myqty. Eń qatty áser etkeni aǵasy Ábýbákirmen kezdesýi boldy. Aǵasy qaryndasyn alyp ketpek bolyp kelisedi, al Álııa bastaǵan isin aıaqsyz qaldyrmaýǵa sheshim qabyldady. Álııa obrazyn somdaý úshin ózim mýzeıge bardym, aqparat izdep, tanystym. Rejısser týystaryna da habarlasyp, baılanysqa shyqty, — dedi Ajar Járdenbekqyzy.
Jas aktrısa K. Baıseıitova atyndaǵy qazaq ulttyq óner ýnıversıtetiniń úshinshi kýrs stýdenti. Qazirgi kezde ol grýppalastarymen birge dýaldy oqý júıesi negizinde T. Ahtanov atyndaǵy oblystyq drama teatrda bilim alyp júr. Al mıýzıkldiń qoıýshy rejısseri — Eslám Nurtazın.
Aıta keteıik, Keńes Odaǵynyń batyry Álııa Moldaǵulovanyń oblystyq memorıaldy mýzeıi bıyl qaıta jańǵyrtyldy. Mýzeıinde birqatar qujattyń, fotosýretterdiń túpnusqasy saqtalǵan. Sonymen birge Álııa Moldaǵulova jerlengen jerden topyraq, gúl ákelingen.
Eske salsaq, Álııa Moldaǵulovanyń 100 jyldyǵy maýsym aıynda ótedi. 12 maýsymda Álııanyń týǵan jeri Qobda aýdanynda jáne 13 maýsymda Aqtóbe qalasynda birneshe shara uıymdastyrylady.