Aqtóbede Álııa Moldaǵulova týraly fılm túsirile bastady
AQTÓBE. QazAqparat - Qazaqtyń batyr qyzy Álııa Moldaǵulovanyń týǵan jerinde fılm túsirilip jatyr. Qysqametrajdy fılmniń qys mezgilindegi kadrlaryn túsirý úshin arnaıy okop qazyldy, dep habarlaıdy QazAqparat tilshisi.
Aqtóbe oblysy Qobda aýdanynda Álııa Moldaǵulova týraly qysqametrajdy fılm túsirilip jatyr. «Álııa - uly dala óreni» atty kartınany PVE Production kınokompanııasy túsirýde. Al Aqtóbe oblysynyń ákimdigi, Qobda aýdanynyń ákimdigi jáne Aqtóbe oblystyq mádenıet, qujattama jáne muraǵattar basqarmasy qoldaý kórsetýde. Qazirgi ýaqytta Álııa Moldaǵulovanyń qan maıdandaǵy erlikteri men urys qımyldary taspalanýda. Traktormen arnaıy okoptar qazyldy.
Fılm túsirý jumystary aqpan aıynyń aıaǵynda bastaldy. Alǵashqy kadrlar «Álııa» patrıottyq tárbıe berý ortalyǵynda jasaldy. Túsirilim jaz mezgilinde de jalǵasatyn bolady.
«Astanadan kıno túsirýge arnaıy top keldi. Olar óz sapary kezinde aldymen Álııatanýshy retinde maǵan jolyqty. Biz olarǵa oblys ortalyǵyndaǵy murajaıdy tanystyryp, málimet berdik. Keıin top Álııa aýylyna ketti. Qazir qysqy merzimdegi kadrlar túsirilip jatyr. Men batyr qyzdy somdaıtyn ártisti de kórdim. Ol kezde Álııa Moldaǵulova 18-19 jastaǵy qyz bolǵan. Bir baıqaǵanym, kıno túsirýge kelgen top qazaqtyń batyry týraly jan-jaqty aqparat biledi jáne buryn Reseı jerindegi izdestirý jumystaryna qatysqan adam»,- dedi ondaǵan jyl boıy Álııa Moldaǵulovany zerttep, kitap jazǵan Ǵalymjan Baıderbes.
Aıta keteıik, qazaqtyń batyr qyzy Álııa Moldaǵulova Ekinshi dúnıejúzilik soǵysqa attanǵanda nebári 19 jasta boldy. Qolyna qarý alyp, mergendik tanytqan ol 78 jaý áskeriniń kózin joıyp, Keńes Odaǵynyń batyry ataǵyn aldy.
Qazirgi kezde Aqtóbe qalasynda Álııa Moldaǵulova dańǵyly bar. Sonymen qatar, Álııa Moldaǵulova atyndaǵy medıtsınalyq kolledjde arnaıy kórme zaly uıymdastyrylǵan. Qobda aýdanynyń Álııa aýylynda patrıottyq tárbıe berý ortalyǵy, murajaı bar.
