Aqtóbede alıment tólemeıtin ákeler kóbeıdi
AQTÓBE. QazAqparat - Aqtóbede keıbir boryshker ákeniń bereshegi 2 mıllıon teńgeden asqan. Oblys ortalyǵynda turatyn 700 boryshkerge el aýmaǵynan shyǵýǵa tyıym salyndy, dep habarlaıdy QazAqparat tilshisi.
Aqtóbede memlekettik jáne jeke menshik sot oryndaýshylary boryshkerlermen kúresti kúsheıtti. Qazir oblys boıynsha 8 myńnan astam boryshker bar. Onyń 700-i el aýmaǵynan shyǵa almaıdy.
«Boryshker ákelerdiń tizimi jasalyp, oblystyq ádilet departamentiniń arnaıy saıtyna salyndy. Olardyń jasy ártúrli. Balasyna bereshek ákelerdiń eń jasy 21-de bolsa, úlkeni 55 jasta. Boryshkerlerdiń kóbi jumys istemeıdi. Olardy jumyspen qamtý ortalyǵyna jiberemiz, balasyna bereshek er adamdar ol jerge barmaıdy, jumysqa ornalasýǵa nemquraıly»,- dedi sot Nurjámıla Tóleýova. Boryshkerler jumyspen qamtý ortalyǵyna barǵanymen, keıde olardyń mamandyqtary suranysqa saı bolmaı shyǵady. Sot oryndaýshylary kúres jumystary kezinde boryshkerlerdiń tizimi men olardyń sýretin qoǵamdyq kólikterge de ilip qoıdy. Barlyǵy 200 áke ákimshilik jaýapkershilikke tartyldy.
