Aqtóbede alıment tólemeı júrgen 190-ǵa jýyq boryshkerge izdeý jarııalandy
AQTÓBE. KAZINFORM – Aqtóbede alıment tólemeı, mekenjaıyn ózgertpesten habar-osharsyz qalǵan 189 azamatqa izdeý jarııalanǵan. Bıyl 3 adam qylmystyq, 150 boryshker ákimshilik jaýapqa tartyldy.
Aqtóbe oblysy boıynsha jeke sot oryndaýshylarynda alıment óndirýge qatysty 13 myńnan astam atqarý óndirisi bar. Qazirgi kezde 8 myńnan astam boryshker alımentti ýaqytyly tólep otyr.
Jeke sot oryndaýshylarynyń óńirlik palatasy aı saıyn monıtorıng júrgizedi. Problemalyq suraqtar, onyń sheshý joldary talqylanady. Oblysta 5500 boryshker atqarý óndirisi boıynsha alıment tólemeı júr. Olar jumyssyz. Ereje boıynsha atqarý óndirisi qozǵalǵan kúnnen bastap boryshkerge habarlama jiberiledi. 3 aıda barlyq esepshoty buǵattalady, jaýapkershiligi qarastyrylady. Ákimshilik jaýapqa tartylyp, 5 kúnge deıin qamaýǵa alynady. Úsh aıdan keıin qylmystyq is qozǵalady.
Jyl basynan beri 20-dan astam atqarý óndirisi qylmystyq is qozǵaýǵa jiberildi. Onyń ishinde polıtsııa tek 11-in tirkep, 3 is sotqa joldandy. Al 150 boryshker ákimshilik jaýapqa tartylyp, onyń 98-ine aıyppul salyndy. 52 boryshkerge qamaý jazasy taǵaıyndaldy.
Sonymen qatar izdeýde júrgen boryshkerler bar. Turǵylyqty jeri belgisiz, Aqtóbe oblysynda tirkeýden shyqpaǵan 189 azamatqa izdeý jarııalandy,- dedi Aqtóbe oblysy boıynsha jeke sot oryndaýshylarynyń óńirlik palatasy basshysynyń orynbasary Qaırat Tańqaev. Onyń aıtýynsha, alıment óndirisinde 260 problemalyq is bar. Olardyń bereshegi 854 mln teńgeden asyp ketti.
- Jeke sot oryndaýshylary jyl basynan beri 125 atqarý óndirisi boıynsha 132 mln teńgege jýyq berejaq aqshany óndirdi. Jumys istemeıtin, alıment tólemeıtin boryshkerler úshin bos oryndar jármeńkesi jıi ótkiziledi. Ár sot oryndaýshy aptasyna 2 boryshkerge joldama usynady. Bıyl 112 boryshker jumyspen qamtyldy. Sonymen birge 265 boryshker óz betimen jumysqa turdy, - dedi Qaırat Tańqaev.
Aıta keteıik, Aqtóbe oblysy boıynsha jeke sot oryndaýshylardyń óńirlik palatasynda 106 jeke sot oryndaýshy jumys isteıdi. Sot oryndaýshyda barlyq kategorııada atqarý óndirisi bar.
