Aqtóbede alıment tólemegen 6 boryshker qylmystyq jaýapqa tartyldy

AQTÓBE. KAZINFORM – Aqtóbede 2 myńǵa jýyq boryshker áke balasyna alıment tóleýden jaltaryp júr. Bıyl 6 boryshker qylmystyq jaýapqa tartylyp, olarǵa bas bostandyǵynan shekteý jazasy taǵaıyndalǵan.

Óńirlik jeke sot oryndaýshylar palatasynda 16 myń atqarý óndirisi bar. Onyń 10 myńǵa jýyǵy Aqtóbe qalasyna tıesili. Sonyń ishinde 8 myńnan astamy alıment bereshegimen baılanysty qujat.

- Tizimge engen 1900-den astam adam alımentti durys tólemeıdi. Bıyl sot aktisi talabyn oryndamaǵany úshin 538 boryshker ákimshilik jaýapqa tartyldy. Nátıjesinde 389-y qamaýǵa alyndy, qalǵany aıyppul tóledi. Bıyl jyl basynan beri 20-dan astam bos jumys oryndary jármeńkesi ótti. Ol kezde 280 boryshker jumysqa ornalasty,- dedi sot oryndaýyshysy Nurlan Zeıneǵalıev.

Aqtóbedegi alıment óndirý keńsesinde 15 sot oryndaýshysy jumys isteıdi. Bıyl olar prokýratýra jáne polıtsııamen birge qylmystyq jaýapqa tartý usynysyn da bergen.

- Jyl basynan beri 19 boryshkerdi qylmystyq jaýapqa tartý isi joldandy. Barlyǵy 6 boryshkerge qatysty is sotqa joldandy. Boryshkerlerge bas bostandyǵyn shekteý jazasy taǵaıyndaldy. Qoǵamdyq jumysqa tartylyp jatyr,- dedi Óńirlik jeke sot oryndaýshylar palatasy basshysynyń orynbasary Qaırat Tanqaev.

Eske salsaq, Almaty qalasy ádilet departamentiniń basshysy Balaıym Kesebaevanyń aıtýynsha, jekemenshik sot oryndaýshylarynyń qaraýynda 22 688 alımenttik is bar. Onyń tek 70-i naqty oryndaldy, 2 879-y boıynsha aıaqtaldy, al 1 000 is problemaly bolyp qalyp otyr.