Aqtóbede áli de 17 aýylda jaryq joq

AQTÓBE. QazAqparat – Aqtóbe oblysynda borandy kúni baǵalar qulap, sym úzildi. Qazirgi kezde 17 aýyl halqy jaryqsyz otyr, dep habarlaıdy QazAqparat tilshisi.

Aqtóbe oblysynda birneshe aýyl áli de jaryqsyz otyr. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq energetıka jáne turǵyn úı-kommýnaldyq sharýashylyq basqarmasy basshysynyń bólim basshysy Nurbergen Bekeev aıtty.

«17 eldimekende jaryq joq. Atap aıtar bolsaq, Áıteke bı aýdanynda 1, Qobdada 1, Mártókte 5, Hromtaýda 5, Yrǵyzda 3, Shalqar aýdanynda 2 aýylǵa elektr togy áli berilmedi. Brıgadalar jumys istep jatyr. Budan bólek jelilerdi qarap, qandaı da bir qosymsha aqaý bar-joǵyn tekserýge aldy. Qalpyna keltirý jumystaryn nege uzap ketti degenge keler bolsaq, jol nashar. Kólik jete almaı, batyp qalyp jatyr. Ásirese Hromtaý aýdanynda. Onda kórshiles Qarǵaly aýdany men Aqtóbe qalasynan brıgada baryp, kómektesti. Baǵanalar qulap, sym úzilgen. Qulaǵan baǵanany qaıta ornatý úshin kranmen barady. Mártók, Qobda, Hromtaý aýdandary boıynsha búgin keshke deıin bitirýge kúsh salady»,- dedi Nurbergen Bekeev.

Bul aýyldarda áleýmettik mańyzy bar nysandarǵa generator qosylǵan.

Aıta keteıik, 14 sáýirden bastap oblystyq aýdandarynda baǵanalar qulap, sym úzilgen. Barlyǵy 7 aýdanda ondaǵan aýyl halqy jaryqsyz qaldy.

Oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Nurbergen Bekeevtiń aıtýynsha, jalpy oblys boıynsha elektr jelisiniń 74 % tozǵan.