Aqtóbede alǵashqy qar jaýyp jatyr
AQTÓBE. KAZINFORM — Sınoptıkter kún kúrt sýytyp, jańbyr, qar jaýatynyn habarlady. Al polıtsııa júrgizýshilerdi saq bolýǵa úndedi.
«Qazgıdromet» RMK Aqtóbe oblysy boıynsha fılıaly búgin táýlik boıy oblystyń batysynda, soltústiginde qatty jaýyn-shashyn, onyń ishinde jańbyr, qar jaýatynyn aıtyp, eskertti.
Jel soltústik-batystan, batystan soǵady jáne ekpini 15-20 m/s bolady. Ásirese, oblystyń soltústiginde, soltústik-shyǵysynda ornalasqan Hromtaý, Mártók aýdandarynda qar mol túsip, turǵyndar áleýmettik jelide foto-vıdeolardy bólisip jatyr.
— 4 qazanda oblystyń ońtústiginde, shyǵysynda jeldiń ekpini 23-28 m/s, 5 qazanda oblystyń soltústiginde, shyǵysynda ekpini 23-28 m/s jetedi. Aýa temperatýrasy 4 qazanda túnde 0-5 gradýs jyly, oblystyń batysynda, soltústiginde 5 gradýs aıaz, kúndiz 2-7 gradýs jyly bolady, — dep habarlady sınoptıkter.
Aqtóbe oblystyq polıtsııa departamenti baspasóz qyzmeti júrgizýshilerdi saq bolýǵa úndedi.
— Qazirgi ýaqytta óńirde qar aralas jańbyr jaýyp tur. Jol durys kórinbeı qalýy múmkin. Taıǵaq bolýy yqtımal. Osyǵan baılanysty júrgizýshilerden jyldamdyqty qatań saqtaýdy, kólik quraldary arasyndaǵy araqashyqtyqty ulǵaıtýdy, qaýipti manevrlerden bas tartýdy jáne jol qozǵalysy erejelerin saqtaýdy suraımyz. Alys jolǵa shyǵar aldynda aýa raıy men jol jaǵdaıyn naqtylap, kóliktiń tehnıkalyq jaǵdaıyn tekserip alǵan jón, — dep habarlady polıtsııanyń baspasóz qyzmeti.
Eske salsaq, «Qazgıdromet» RMK Qazaqstannyń 17 oblysynda aýa raıyna baılanysty eskertý jasady. 4 qazanda jeldiń ekpini 28 m/s-qa deıin jetip, jańbyr, qar jaýyp, naızaǵaı oınaıdy jáne tuman túsedi.
