Aqtóbede áleýmettik jelide bastalǵan janjal jappaı tóbeleske ulasyp, eki jigit kóz jumdy

Aqtóbe qalasynda top arasyndaǵy tóbelesten 2 jigit kóz jumdy. Olar aldymen Instaqram jelisi arqyly bir-birimen sózge kelip, keıin kezdesken. Sol kezde tóbelesip, ekeýi aýrýhanada kóz jumdy, dep habarlaıdy Kazinform.

Aqtóbe oblystyq Polıtsııa departamenti baspasóz qyzmetiniń habarlaýynsha, oqıǵa 2-qańtardan 3-qańtarǵa qaraǵan túni tirkeldi.

Bir top jigit kezdesip, tóbelesken. Tórt adam pyshaq jaraqatyn alyp, aýrýhanaǵa tústi. Saldarynan 2006 jyly týǵan eki jigit jansaqtaý bóliminde kóz jumdy.

- Janjal Instaqram áleýmettik jelisindegi qaqtyǵystan bastalǵan. Sodan keıin olar kezdesip, talqylaýǵa kelisken. Ustalǵandar ýaqytsha ustaý ızolıatoryna qamaldy. Qazir Qylmystyq kodekstiń «Kisi óltirý» baby boıynsha sotqa deıingi tergeý júrgizilip jatyr. QR QPK-niń 201-babyna sáıkes ózge de aqparat jarııalaýǵa jatpaıdy,- dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.