Aqtóbede áleýmettik nysandar jylytý maýsymyna daıyn ba
AQTÓBE. KAZINFORM – Óńirde áli de pesh jaǵatyn jeti bilim berý nysany bar. Búginde mektep pen balabaqshaǵa qajetti otynnyń 90% jýyǵy tasymaldandy.
Aqtóbe oblystyq máslıhatynda depýtattar áleýmettik nysandardyń jylytý maýsymyna daıyndyǵyn surady. Qazirgi kezde óńirdiń jalpy daıyndyǵy 60% qurap otyr. Qajetti otyn qorynyń da 60% jetkizildi. Al áleýmettik nysandarǵa keler bolsaq, bilim berý salasynda otynnyń 88% tasymaldandy.
- Óńirde Aqtóbe oblystyq bilim basqarmasyna qarasty 702 memlekettik bilim berý uıymy jumys isteıdi. Onyń 106-y qatty otynmen, 14-i suıyq otynmen, 295-i kógildir otynmen, 26-y elektr qazandyǵymen, jeteýi peshpen jylytylady. 304 bilim berý uıymy ortalyqtandyrylǵan jylý júıesine qosylǵan. Búgingi tańda 88% otyn tasymaldandy. Kelisimshart boıynsha qalǵany 1-qazanǵa deıin tasymaldanady. Sonymen birge 38 bilim berý uıymyna qazandyq, sorǵy, jylý almastyrǵyshtardy satyp alýǵa, 9 bilim berý uıymynyń jylý qubyryn júndeýge 305,5 mln teńge bólindi,- dedi Aqtóbe oblystyq bilim basqarmasynyń basshysy Bulbul Kúzembaeva.
Al mádenıet salasynda úsh aýdandaǵy tórt nysanǵa qatty, suıyq otyn áli jetkizilmedi.
- Mádenıet salasynda 235 ǵımarat bar. Qajettisi 1859 tonna qatty otyn, 160 tonna dızel otyny. Búgingi tańda barlyq mekeme kelisimshart jasalyp, otyn jetkizildi. Tek Mártók aýdany Dostyq aýylynyń kitaphanasyna 8 tonna kómir, Muǵaljar aýdany Qumsaı aýyldyq klýbyna 25 tonna suıyq otyn men Jańaturmys aýyldyq klýbyna 10 tonna kómir, Áıteke bı aýdany Tolybaı mýzeıine 25 tonna kómir jetkizý úshin ekinshi ret konkýrs jarııalandy,- dep habarlady Aqtóbe oblystyq mádenıet, arhıvter jáne qujattama basqarmasy.
Aqtóbe oblystyq jumyspen qamtý jáne áleýmettik baǵdarlamalar basqarmasynyń basshysy Lázzat Orazbaevanyń aıtýynsha, bıyl jylytý maýsymyna 5 nysan daıyndalady. Olardyń arasynda qarttar úıi, júıke aýrýyna shaldyqqan balalardy ońaltý orny bar. Sonyń ishinde №2 áleýmettik qyzmet kórsetý ortalyǵynda qazandyq jańǵyrtylyp jatyr. Al oblystyq densaýlyq saqtaý basqarasy, sport basqarmalary daıyndyqty tamyz aıynyń sońyna deıin aıaqtamaq.
Buǵan deıin habarlaǵanymyzdaı, bıyl Aqtóbede ınvestıtsııalyq baǵdarlama aıasynda 2,8 mlrd teńge qarastyryldy. Onyń ishinde 2,3 shaqyrymdyq sýmen jabdyqtaý júıesin jańartýǵa 1,1 mlrd teńge jumsalady. Al 1,8 shaqyrymdyq jylýmen jabdyqtaý júıesine 1 mlrd teńgeden astam qarjy qarastyryldy. Sý burý júıesin jańartýǵa 653 mln teńgeden astam qarjy jumsalady.
