Aqtóbede áleýmettik nan shyǵaratyn kásiporynnyń biri jumysyn toqtatty
AQTÓBE. KAZINFORM – «Aqtóbe nan» JShS-niń qaryzy 170 mln teńgege jetken. Kásiporyn basshylyǵy qaryzdy keshirý týraly usynys aıtty.
Aqtóbe qalasynda áleýmettik nandy «Ramazan nan», «Atameken nan», «Nanym nan» jáne «Aqtóbe nan» JShS-i pisiredi. Bul kásiporyndardyń ishinde qazir «Aqtóbe nan» JShS-i jumysyn toqtatty. Sebebi forvardtyq kelisimshartpen jumys istep otyrǵan «Aqtóbe» ÁKK» AQ-y І-surypty un jetkizýdi ýaqytsha toqtatty. Kompanııanyń úsh jyldyq berejaǵy 175 mln teńgege jetken.
– Bizde óndiris 28 aqpannan bastap toqtady. Nan ónimderi ǵana emes, makaron tsehy da jumys istemeı tur. Áleýmettik nan da shyǵarylmaıdy. Sebebi «Aqtóbe» ÁKK» AQ-y un tasymaldaýdy toqtatty. Olardyń aldynda qaryzymyz bar, ony moıyndaımyz. Biraq ony óteı almaımyz, tek bar qaryzdy keshirýdi surap otyrmyz, - dedi «Aqtóbe nan» JShS dırektorynyń orynbasary Sultan Aqtaev.
Forvardtyq kelisimshart boıynsha «Aqtóbe» ÁKK» AQ-y jyl saıyn un jetkizedi. Unnyń kelisi 120 teńge dep eseptelgen. Al áleýmettik nan baǵasy – 105 teńge. Kompanııa munyń ózin shyǵyn dep eseptep, byltyr nan baǵasyn 135-136 teńgege deıin kóterýdi surady. Ózindik qunyn 125 teńge dep eseptedi ári qosymsha tabys tabý úshin 135 teńgeni qup kórdi. Biraq áleýmettik nan baǵasyn kóterýge kelisim bolmady. Qazir kásiporyn basshylyǵy tyǵyryqtan shyǵar joldy bilmeı otyr.
– Bizde shyǵarylatyn ónimniń 76% - áleýmettik nan. Burynnan solaı. Kompanııanyń 50 jyldyq tarıhy bar. Ózge ónim bolsa kompanııa shyǵanyn jaba almaıdy. Shyǵyn jaba almaǵan soń nan kombınatyndaǵy qural-jabdyq, tehnologııa jańarmady. Sóıtip qaryzymyz jınala bastady. Bizge tóle dep talap etip jatyr. Al bizde aqsha joq, óndiristi toqtatýǵa májbúr boldyq. Munda 148 adam jumys isteıdi. Ázirge tek eńbek demalysyna jibere alamyz. Ári qaraı ne bolary belgisiz? Jumysshylardyń ortasha aılyǵy – 119 myń teńge. Jalaqy eki jyldan beri kóterilmedi. Oblys basshylyǵymen kezdesip, qaryz týraly talqylasaq deımiz. Keri baılanys bolmasa, jumys toqtaıdy. Shynymdy aıtsam, tyǵyryqtan shyǵar jol kórip turǵanym joq. Bul jerde kezekti turǵyn úı, meıramhana nemese saýda úıin salatyn kúıge jetti, - dedi ol.
Al, «Aqtóbe» ÁKK» AQ-y qaryzdy bólip tóleý týraly usynys aıtty.
– «Aqtóbe» ÁKK» AQ bul kásiporynǵa І-surypty un tasymaldaıdy. «Aqtóbe nan» sekildi bizde «Ramazan nan», «Atameken nan», «Nanym nan» JShS-i bar. Sonyń ishinde «Aqtóbe nan» JShS-niń qaryzy 170 mln teńge. Bul úsh jyldyq qaryz. Kásiporyn basshylyǵyna qaryzdy bólip tóleý, jańa keste jasaý jóninde usynys berdik. Ázirge naqty jaýap joq, - dedi «Aqtóbe» ÁKK» AQ departament dırektory Tımýr Bımanov.
Aıta keteıik, Aqtóbede ıgerilýi tıis 865 myń gektar jerdiń 506 myń gektaryna dándi daqyl egiledi. Egis naýqanyna 49 myń tonna tuqym qajet bolsa, onyń 90%-y daıyndaldy. Kóbi birinshi synypty tuqym.