Aqtóbede áleýmettik mańyzy bar avtobýs baǵytyn sýbsıdııalaý úshin jylyna 20 mlrd teńge jumsalady

AQTÓBE. KAZINFORM – Aqtóbe qalalyq ákimdigi 42 baǵytty sýbsıdııalaıdy. Jylyna shamamen 20 mlrd teńge bólýdi josparlap otyr. 

Aqtóbe qalasy ákimdiginiń saıtynda «Sýbsıdııalaýǵa jatatyn áleýmettik mańyzy bar qatynastardyń 2025-2027 jyldarǵa arnalǵan tizbesi» týraly qujat jarııalandy.

Tasymaldaýshylardyń shyǵynyn bıýdjet qarajaty esebinen sýbsıdııalaý qaǵıdalaryna súıengen tarıfteri jónindegi komıssııa hattama toltyryp, Aqtóbe qalasynyń ákimi qaýly shyǵardy. Onda 2024-2026 jyldarǵa arnalǵan qaýlynyń kúshi joıylyp, 2025-2027 jyldarǵa arnalǵan tizbesi qoldanysqa enetini týraly jazylǵan.

Qujatqa súıensek, qalada barlyǵy 42 baǵyt shyǵyny sýbsıdııalanady. Sýbsıdııa ár baǵytqa ártúrli tólenedi. Eń arzany - №49 baǵyt. Munda ár shaqyrymy 269 teńge dep belgilengen. Al eń qymbaty №46 baǵyt. Munda ár shaqyrymǵa 1691,77 teńge qarastyrylyp otyr. Jylyna osy bir baǵytqa 1 mlrd teńge bólinýi múmkin. Jalpy 2025-2026 jyldary aralyǵynda áleýmettik mańyzy bar avtobýs baǵytyna 60 mlrd teńge jumsalady. 

Aıta keteıik, Aqtóbede eresekterge arnalǵan jolaqy 80 teńge, al balalarǵa 40 teńge. Zeınetkerler tegin júredi.

Eske salsaq, Aqtóbe qalasy ákimdigi árqaısysy 126 mln teńge turatyn tehnıkany lızıngke satyp almaq. Bul kóshe sypyratyn, shańyn basý úshin sý shashatyn tehnıka.