Aqtóbede áleýmettik azyq-túliktiń shekti baǵasy bekitiledi

AQTÓBE. KAZINFORM – Aqtóbe oblysynda áleýmettik mańyzy bar azyq-túlik baǵasynyń shekti mánin bekitý qaýlysy jarııa talqylaýǵa shyqty. Onda kartoptyń kelisi 285, qanttyń kelisi 510 teńge dep kórsetilgen.

Ashyq NQA portalynda Aqtóbe oblysy boıynsha 2025 jylǵy І toqsanǵa arnalǵan áleýmettik mańyzy bar azyq-túlik taýarlarynyń bólshek saýdadaǵy baǵasynyń shekti mánderi talqyǵa tústi. Onda baǵanyń byltyrǵyǵa qaraǵanda kóterilgenin, keıbiriniń arzandaǵynyn kórýge bolady. 

Portaldaǵy málimetke súıensek, 1 surypty bıdaı unynyń kelisi 223 teńge dep kórsetilgen. Al 2024 jyldyń ІІ toqsanynda kelisi 228 teńge dep bekitilgen. Sonymen birge kúnbaǵys maıynyń lıtri 753 teńgeden aspaýy tıis. Byltyr kartoptyń kelisi 200 teńge dep bekitilse, bıyl birinshi toqsanda 285 teńge kórsetilgen. Bıyl áleýmettik mańyzy bar azyq-túlik taýarlaryna bólshek saýda baǵalarynyń shekti mánin bekitý kezinde sábizdiń kelisi 255, pııaz 241, qyryqqabat 222 teńge dep alyndy. Qant baǵasy 510 teńge dep kórsetilgen. 

- Un baǵasyn bekitkende un óndiretin, satatyn kompanııalardan baǵany suraımyz. Onda un óndirýdiń barlyq shyǵyny qosa eseptelgen. Bárin qosyp, ortasha baǵa shyǵarylady. Demek osy toqsanda bazardaǵy baǵa kelisine 223 teńgeden aspaýy tıis. Qaýly kúshine engende biz osyny talap ete alamyz. Al qanttyń qunyn bekitken kezde kóterme saýdadaǵy baǵany alamyz. Olar ózderi satyp alady, jetkizý qunyn qosady. Bárin eseptegende baǵa 510 teńgeden joǵary bolmaýys tıis. Jalpy baǵa naryqta budan arzan bolýy múmkin, biraq joǵary bola almaıdy,- dedi Aqtóbe oblystyq kásipkerlik basqarmasynyń basshysy Almas Salyqbaev.

Eske salsaq, bıyldan bastap óńirde sý jáne jylýmen jabdyqtaý tarıfi ózgerdi.