Aqtóbede áleýmettik nysandardyń qurylysy keshigip jatyr
AQTÓBE. QazAqparat - Aqtóbede Neke saraıy, Jastar saraıy men oblystyq murajaı sekildi birneshe nysannyń qurylysy keshigip jatyr. Oblys ákimi Berdibek Saparbaev qurylys jumystaryn júrgizýshi kompanııalardy synǵa aldy, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev qaladaǵy birneshe iri qurylys nysanymen tanysty. Memlekettik-jekemenshik seriktestik aıasynda salynyp jatqan birneshe qurylystyń jumysyna qatysty syn aıtyldy.
«Ókinishke qaraı sizderdiń bergen ýádelerińiz merziminde oryndalyp jatqan joq. Mynadaı qarqynmen biz nysandardy salyp úlgermeımiz. Barlyq nysandardy aqtóbelikter men qala qonaqtary úshin salyp jatqanymyzdy umytpaýymyz qajet. Sondyqtan, munyń basqa joly bolý kerek. Biz Aqtóbeniń qutty meken ekenin kórsetýimiz qajet. Qurylys materıaldary jetispegen kezde zaýyttar táýlik boıy jumys jasaýlary qajet. Al bizdegi zaýyttar senbide de, jeksenbide de jumys jasamaıdy. Birinshi kezekte bul sizder úshin jaqsy, bul óndiris qýattylyǵynyń jetistigi»,- dedi oblys ákimi Berdibek Saparbaev.
Oblys ákiminiń baspasóz qyzmetiniń habarlaýynsha, óńir basshysy Berdibek Saparbaev «Nurly jer» baǵdarlamasy aıasynda salynyp jatqan turǵyn úıdiń, memlekettik-jekemenshik seriktestik jáne bıznestiń áleýmettik jaýapkershiligi aıasynda salynyp jatqan nysandardyń qurylysymen tanysty. Olardyń ishinde Akvapark, Neke qııý saraıy, Jastar saraıy, jedel medıtsınalyq kómek beketi men oblystyq murajaı bar.
