Aqtóbede áldebireý metall qabyldaıtyn orynǵa áskerı tank ótkizgen
AQTÓBE. QazAqparat - Aqtóbede metall qabyldaý beketine tank tapsyryp, qazir tergeý júrip jatyr. Tankini kimniń tapsyrǵany týraly aqparat áli kúnge deıin qupııa saqtalyp otyr, dep habarlaıdy QazAqparat tilshisi.
Ulttyq ulannyń áskerı polıtsııasy 66/55 áskerı bólimine habar kelip, tanktiń metall qabyldaý beketinde turǵany anyqtaldy.
«Bizdiń áskerı bólimde áskerı tehnıka bolǵan soń baryp qaraý - mindetimiz. Áskerı bólim ofıtserleri oqıǵa ornyna bardy, qarady. Shyn máninde tank tur. Tek joǵarǵy bóligi, oq-dárisi joq. Sol jerde kimniń tapsyrǵany anyqtaldy. Ony qazir jarııalaı almaımyz. Tekserý júrip jatyr. Áskerı tergeý basqarmasy, Aqtóbe garnızonynyń áskerı polıtsııasyna habar berildi. Qujattar jınaldy. Tankiniń materıaldyq quny joq. Degenmen kez kelgen áskerı tehnıka arnaıy orynda joıylýy tıis»,- dedi 66/55 áskerı bólimi áskerı polıtsııa bólimshesiniń aǵa jedel ýákili Marat Eset.
Onyń aıtýynsha, T-34 markaly tank soǵys kezinde qoldanylǵan. Qazir qoldanysta joq.
«Qazir tanki metall qabyldaý beketinde tur. Naqty sheshim qabyldanǵanǵa deıin áskerıler kúzetedi. Metall qabyldaý beketindegi adamdardyń aıtýynsha, salmaǵy 20 tonna bolady»,- dedi Marat Eset.
