Aqtóbede aldanǵan týrıster isi sotqa tústi
AQTÓBE. KAZINFORM — Aqtóbede aldanǵan týrıster isi sotqa tústi. Іs boıynsha barlyǵy 49 jábirlenýshi bar. Olar Eýropa men Azııany aralap, araldarda tynyǵamyn dep aqshasynan aıyryldy. Sottalýshynyń biri taǵylǵan aıypty moıyndama, ekinshisi ishinara kelisti.
Aqtóbe qalalyq № 2 sotynda erkosh_04_region týrıstik paraqshasynyń ıesi Erkebulan Aımuratuly men onyń kómekshisi bolǵan Nazgúl Aımuratovaǵa qatysty qylmystyq is qarala bastady. Eýropa men Azııany aralatyp, saıahat uıymdastyrýǵa ýáde bergen týrfırma 2025 jyldyń naýryz aıynan bastap qıyndyqqa tap bolǵan. Saldarynan shetelge shyǵa almaǵan adamdar sany artyp, búginde 49 jábirlenýshiniń isi sotqa tústi. Biri 100 myń kóleminde aqsha aýdarsa, taǵy biri mıllıon teńgesinen aıyryldy. Eki aıyptalýshyǵa Qylmystyq kodekstiń 190-baby 3-bóligi 3-tarmaǵymen aıyp taǵyldy.
— Erkebulan Aımuratuly, Nazgúl Aımuratova zańsyz jolmen aqsha tabý maqsatynda alaıaqtyq, aldaý jáne senimdi teris paıdalaný jolymen bótenniń múlkin jymqyrýǵa baǵyttalǵan qasaqana áreketter jasaǵan. Atap aıtqanda Erkebulan Aımuratuly 2025 jyldan bastap óziniń tanysy Nazgúl Aımuratovamen birge Qazaqstan men shet memleketterdiń qalalarynda týrıster baǵyttar usynatyn paraqsha ashyp, ony jarnamalaǵan. Paraqshaǵa shet memleketterde demalyp júrgen adamdardyń, sondaı-aq arzan baǵamen usynylatyn týrıstik saparlardyń jalǵan beınejazbalary men ózge de aqparattar ornalastyryp, azamattardyń nazaryn aýdarǵan. Sonymen qatar Erkebulan Aımuratuly ózin senimdi týragent basshysy retinde tanystyryp, uıaly telefon nómirin kórsetken. 2025 jyldyń naýryz aıynda úsh jábirlenýshi Dýbaı qalasyna týrıstik sapar uıymdastyrylatyny týraly jarnama kórgen. Aqysy — 140 myń teńge. Árqaısysy 140 420 — 142 800 teńgeden berip, kelisimshartqa qol qoıǵan. Alaıda týrıstik agenttikten habarlasqan jigit AQSh pen Iran arasyndaǵy qaqtyǵysqa baılanysty ushýǵa múmkindik bolmaıtynyn aıtyp, 14 kúnde aqshany qaıtaratynyn aıtqan. Degenmen aqshany zańsyz ıemdengen, óz qajettiligine jumsaǵan, — dedi prokýror Sáken Bertileýov.
Aldanǵandar arasynda Aqtóbe, Atyraý, BQO, Mańǵystaý oblystary men Almaty qalasynyń turǵyndary bar. Olar Dýbaı, Japonııa-Koreıa-Malaızııa, Maldıv araldary, Grýzııa-Túrkııa-Ázirbaıjan, Kenııa-BAÁ, Qytaı, sonymen birge Italııa, Frantsııa, Shveıtsarııaǵa saıahattamaq bolǵan. Sotta aıyptalýshy Erkebulan Aımuratuly ózine taǵylǵan aıypty ishinara moıyndady. Alaıaqtyq jasamaǵanyn, biraq qarjylyq shyǵyn bolǵanyn aıtty.
— Tergeý kezinde aqshanyń maqsatsyz jumsalǵany anyqtalmady dep esepteımin. Kassaǵa túsken aqsha bıletke, jatyn orynǵa ketti. Bıyl 11-mamyr kúni server isten shyqty. Keıbir adamdy demalysqa jibere almaǵan soń ortaq chat ashyp, aqshany keri qaıtarýdy bastadyq. Sol sátte 17 mln qaıtarý kerek boldy. Onyń 11 mln teńgesi qaıtaryldy. 6 mln teńge qalǵanda meni tergeý ızolıatoryna jaýyp tastady. Maǵan múmkindik bergende is mundaıǵa deıin barmaıtyn edi. Sol kezde meniń qolymnan kelmeıtin álemdik qaqtyǵystar boldy, áýe keńistigi jabyldy. Odan keıin jazda saıahatqa baratyn týrısterdiń shyǵyny qosyldy, — dedi aıyptalýshy Erkebulan Aımuratuly.
Eske salsaq, Aqtóbe oblystyq saýda jáne tutynýshylardyń quqyqtaryn qorǵaý departamenti bıyl óńirde týrıstik agenttikterge shaǵymdanýshylar kóbeıgenin aıtty.
