Aqtóbede alaıaqtyq jasady degen kúdikpen depýtat ustaldy
AQTÓBE. QazAqparat - Aqtóbe oblystyq máslıhat depýtaty Baqytjan Erjanov ustaldy. Qazirgi kezde úsh derek boıynsha tergeý júrip jatyr, dep habarlaıdy QazAqparat tilshisi.
Aqtóbede depýtat ustaldy. Oblystyq sottyń baspasóz qyzmetiniń habarlaýynsha, qazir 3 derek boıynsha is tergelip jatyr.
«Qylmystyq kodekstiń «Asa iri kólemde alaıaqtyq jasaý», «Densaýlyqqa qasaqana aýyr zııan keltirý», «Bılik ókiline qarsy kúsh qoldaný» baptary boıynsha bultartpaý sharasy taǵaıyndalyp, eki aıǵa qamaýǵa alyndy»,- dedi Aqtóbe oblystyq sotynyń baspasóz qyzmeti. Depýtat tergeý jumystary aıaqtalǵansha ýaqytsha tergeý oqshaýlaǵyshyna qamaldy.
Aıta keteıik, 57 jastaǵy Baqytjan Erjanov Aqtóbe oblysy, Shalqar aýdanynda dúnıege kelgen. Oblystyq máslıhat portalynyń depýtat týraly aqparatyna súıensek, 1985-1994 jyldary Shalqar aýdanynyń Bershúgir ujymsharynda mal dárigeri boly jumys istedi. 2006 jylǵa deıin kásipkerlikpen aınalysyp, «Jańa Áljan» elevatorynyń vıtse-prezıdenti, «Abaı» JShS dırektory, Aqtóbe oblysy Hromtaý aýdanyndaǵy «Jantúzer» sharýa qojalyǵynyń basshysy, «Aıtaba» JShS dırektory boldy. 2006 jyldan bastap «KazPromStroıGrýpp» JShS dırektory qyzmetin atqaryp júr. 2015 jyly «Qurmet» ordenimen marapattaldy. Ár jyldary Hromtaý, Yrǵyz, Shalqar, Temir aýdandarynyń «Jyl adamy» boldy. «Qazaqstan Respýblıkasy Táýelsizdigine 25 jyl» merekelik medalimen marapattaldy. Ol Aqtóbe oblystyq máslıhatynyń VI shaqyrylymynyń depýtaty, máslıhattyń qurylys, kólik, saýda jáne turǵyn úı-kommýnaldyq sharýashylyq máseleleri jónindegi turaqty komıssııasynyń múshesi. «Nur Otan» partııasynyń múshesi. «Kıkboksıng» federatsııasynyń prezıdenti.
Aıta keteıik, Baqytjan Erjanov túrli qaıyrymdylyq sharalaryna qatysady. Bıyl sý tasqyny kezinde bir otbasyǵa 2 bólmeli páter syılaǵan ed i.
