Aqtóbede alaıaqtyq jasap, para bergen áskerı qyzmetkerler sottaldy
AQTÓBE. KAZINFORM — Aqtóbe oblystyq qorǵanys ister jónindegi departamenti kadrlar jáne saptyq bólimshesiniń bastyǵy alaıaqtyq jasaǵany úshin kináli dep tanyldy. Taǵy tórt áskerı qyzmetker para bergeni úshin sotty boldy.
Aqtóbe oblystyq qorǵanys ister jónindegi departamenti kadrlar jáne saptyq bólimshesiniń 25 jastaǵy bastyǵyna Qylmystyq kodekstiń «Alaıaqtyq», Taraz qalasyndaǵy 42062 áskerı bóliminiń ofıtser — psıhologi, Taldyqorǵan qalasyndaǵy 54380 áskerı bóliminiń tárbıe jáne ıdeologııalyq jumystary bóliminiń ofıtseri, Astana qalasyndaǵy 68665 áskerı bólimi «Arnasaı» shabýyldaý batalony shabýyldaý rotasynyń komandıri, shabýyldaý batalony komandıriniń orynbasaryna «Para berý» baby boıynsha aıyp taǵyldy. Bul tizimde Yrǵyz aýdany qorǵanys bóliminiń bastyǵy da bar. Oǵan qatysty is qysqartyldy. Sebebi áskerı qyzmetker sýıtsıd jasady.
Іs materıalyna súıensek, Aqtóbe oblystyq qorǵanys ister jónindegi departamenti kadrlar jáne saptyq bólimshesiniń bastyǵy qyzmet babyn paıdalanyp, alaıaqtyq jasady. Qumar oıynǵa áýes sottalýshy áskerı qyzmetkerlerdi kez kelgen bólimge aýystyrýǵa ýáde beredi. 2024 jyly 30212 áskerı bólimi rota komandıriniń tárbıe jáne ıdeologııalyq jumystar jónindegi orynbasaryna Astana qalasynda ornalasqan áskerı bólimderdiń birine aýystyra alatynyn aıtady. Odan barlyǵy 2 mln teńge alyp, býkmekerlik keńsede bás tigedi.
Aqtóbe oblystyq qorǵanys ister jónindegi departamenti kadrlar jáne saptyq bólimshesiniń bastyǵy osy jolmen 1,5 mln teńge, 1 mln teńge jáne 150 000 teńge alyp, aqshany qumar oıynǵa salyp otyrǵan. Sot otyrysynda sottalýshylar taǵylǵan aıypty moıyndamady.
Sot úkimimen Aqtóbe oblystyq qorǵanys ister jónindegi departamenti kadrlar jáne saptyq bólimshesiniń bastyǵy «Alaıaqtyq» babymen aıypty dep tanylyp, 5 jylǵa bas bostandyǵynan aıyryldy.
Al Qylmystyq kodekstiń «Para berý» baby boıynsha aıyptalǵan eki sottalýshy 2 jylǵa bas bostandyǵynan aıyryldy.
Taǵy bir sottalýshyǵa paranyń 20 eselengen mólsheri, ıaǵnı, 3 000 000 teńge aıyppul taǵaıyndaldy. Bári de áskerı sheninen aıyryldy.
Aıta keteıik, Aqtóbe áskerı sotynda kýrsant ólimine qatysty is boıynsha sot otyrysy ótip jatyr.