Aqtóbede alaıaqtyq jasady degen kúdikke ilikken eks-sheneýnik aqtalyp shyqty
AQTÓBE. KAZINFORM - Aqtóbe qalasy ákimi apparatynyń basshysy qyzmetin atqarǵan Nursultan Isembaıuly sotta aqtalyp shyqty. Oǵan Qylmystyq kodekstiń «Alaıaqtyq» baby boıynsha aıyp taǵyldy.
№2 Aqtóbe qalalyq sotynda sottalýshy Nursultan Isembaıulyna qatysty is qaraldy. Іs byltyr jeltoqsan aıynda túsip, kúni búginge deıin júrdi. Oǵan Qylmystyq kodekstiń «Alaıaqtyq» baby, ıaǵnı, memlekettik fýnktsııalardy oryndaýǵa ýákilettik berilgen adamnyń qyzmet babyn paıdalanyp bótenniń múlkin jymqyrý, aldaý nemese senimdi teris paıdalaný arqyly bótenniń múlikin ıemdený boıynsha aıyp taǵyldy. Aıyptaý qorytyndysyna súıensek, 2022 jyly S.Sabyrova kommertsııalyq maqsatta jer almaq bolyp, tanysy B.Oljagereevke habarlasady.
Ol kezde B.Oljagereev Aqtóbe qalasynyń tıimdi damý ortalyǵy basshysynyń orynbasary qyzmetinde júrip, áńgimeni qala ákimi apparatynyń jetekshisi bolǵan Nursultan Isembaıulyna jetkizgenin, onyń 3 mln teńge aqsha suraǵynyn aıtady. 2022 jyldyń qyrkúıek aıynda B.Oljagereev S.Sabyrovamen dámhanada kezdesip, 3 mln teńge aldy, B.Oljagereev aqshany Aqtóbe qalasy ákimi apparatynyń kabınetinde Nursultan Isembaıulyna beredi. Sot otyrysynda sottalýshy kinásin moıyndamady.
- Sot jaryssózderinde memlekettik aıyptaýshy Qylmystyq kodekstiń 190 babynyń 3 bóliginiń 2 tarmaǵynda kózdelgen qylmystyq quqyq buzýshylyqty jasaǵany úshin kináli dep tanyp, ómir boıy memlekettik qyzmette qyzmet atqarý quqyǵynan aıyra otyryp, 5 jyl merzimge bas bostandyǵynan aıyrý túrindegi jazany taǵaıyndaýdy surady. Sot úkimimen Nursultan Isembaıuly kinásiz dep tanylyp, qylmystyq quqyq buzýshylyq jasaýǵa qatysqany dáleldenbegeni úshin aqtaldy. Ol qylmystyq protsesti júrgizetin organnyń zańsyz áreketteri kezinde keltirilgen zııandy óteýge quqyly. Basqa tulǵany jaýapqa tartý qajettiligi týraly máseleni sheshý úshin isti prokýrorǵa jiberý týraly sheshim qabyldandy. Sot úkimi zańdy kúshine engen joq,- dep habarlady №2 Aqtóbe qalalyq sotynyń baspasóz qyzmeti.
Eske salsaq, Aqtóbe qalasynyń jol qaýipsizdigin qamtamasyz etý jáne tsıfrlyq tehnologııalar ortalyǵynyń dırektory 8 jylǵa bas bostandyǵynan aıyrylýy múmkin. Oǵan «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyp taǵyldy.