Aqtóbede alaıaqtyq deregine qatysy bar kúdikti ustaldy
ASTANA. KAZINFORM — Aqtóbede polıtsııa qyzmetkerleri birneshe alaıaqtyq deregine qatysy bar kúdikti er adamdy ustady. Bul týraly ІІM baspasóz qyzmeti jarııalady.
Tergeý málimetteri boıynsha birinshi jaǵdaıda kúdikti «salyq organdaryndaǵy buǵattalǵan esepshotty ashyp beremin» degen jeleýmen qurylys kompanııasynyń býhgalterin aldap, 580 myń teńge qarjysyn ıemdengen.
Ekinshi jaǵdaıda ol kásipkerge basqa oblysta turatyn, iri kólemde qaryzy bar azamatty taýyp berýge kómektesetinin aıtyp, senimine kirgen. Osy syltaýmen kásipkerden 4 mıllıon teńge alyp, óz paıdasyna jaratqan.
Jedel-izdestirý is-sharalary barysynda polıtsııa qyzmetkerleri kúdiktiniń jeke basyn anyqtap, ony polıtsııa bólimine jetkizdi.
Atalǵan faktiler boıynsha alaıaqtyq deregimen sotqa deıingi tergep-tekserý bastaldy. Oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip, kúdiktiniń osyǵan uqsas basqa da qylmystarǵa qatysy bar-joǵy anyqtalyp jatyr.
— Polıtsııa azamattardy qyraǵylyq tanytýǵa, beıtanys adamdardyń túrli qyzmet kórsetemin degen ýádelerine senip, aqshalaı qarajatty bermeýge jáne mundaı jaǵdaılarda olardyń ókilettigi men usynylǵan aqparattyń shynaıylyǵyn mindetti túrde tekserýge shaqyrady, — delingen aqparatta.
Aıta keteıik, Aqtóbede týrıstik joldamamen aldaǵan kúdiktige qatysty is qozǵaldy.
