Aqtóbede alaıaqtyǵy úshin aıyptalyp jatqan depýtattar bas bostandyǵynan aıyrylýy múmkin
AQTÓBE. KAZINFORM – Jaryssózde prokýror eki depýtatty 6 jyl 8 aıǵa bas bostandyǵynan aıyrýdy surady. Sonymen birge Muǵaljar aýdandyq máslıhatynyń tóraǵasy bolǵan sottalýshynyń qylmystyq jolmen alǵan múlki tárkilenýi múmkin.
№ 2 Aqtóbe qalalyq sotynda Muǵaljar aýdandyq máslıhatynyń tóraǵasy, depýtaty jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshyǵa qatysty is qaralyp, jaryssóz bastaldy. Memlekettik aıyptaýshy Temirlan Ibragım máslıhat tóraǵasy qyzmetin atqarǵan sottalýshynyń 5 qabatty jataqhanany satyp alyp, keıin ony áıeline syıǵa bergenin, artynsha óz atyna qaıta jazdyrǵanyn aıtty.
- Qylmystyq is qujatynda 2023 jyldyń 9 tamyzynda ár páterdi áıeline syıǵa bergeni týraly málimet bar. ıAǵnı memlekettik satyp alý konkýrsy ótkenge deıin syıǵa bergen. Al memlekettik satyp alý kelisimshartyna qol qoıǵannan keıin, 2023 jyly 22-qarashada áıelimen aradaǵy syıǵa berý kelisimsharty úzilgen. Eki kúnnen keıin sottalýshynyń áıeli men Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy arasynda qabyldaý aktisi jasalǵan. Sóıtip áıeliniń esepshotyna 672 mln teńge aýdarylady. ıAǵnı eki kún buryn syıǵa berý kelisimsharty úziledi, sonda da áıeliniń esepshotyna bıýdjet qarjysy aýdarylady,- dedi prokýror.
Jaryssózde prokýror úsh jyljymaıtyn múlik, bir kólik te qylmystyq jolmen tapqan aqshaǵa alynǵan dep esepteıtinin jáne tárkileýge jatatynyn jetkizdi. Alaıda bul múlikter sottalýshynyń áıeliniń atyna aýdarylǵan. Bank depozıtterinde 300 mln teńgeden astam aqsha da bar. Memlekettik aıyptaýshy Muǵaljar aýdandyq máslıhat tóraǵasy bolǵan sottalýshyny 6 jyl 8 aıǵa bas bostandyǵynan aıyryp, múlkin tárkileýdi, oǵan kómektesken depýtatty 6 jyl 8 aıǵa bas bostandyǵynan aıyrýdy surady. Al Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy sot zalynan qamaýǵa alynyp, 6 jylǵa bas bostandyǵynan aıyrylýy múmkin.
Eske salsaq, Muǵaljar aýdandyq máslıhatynyń tóraǵasy, depýtaty jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshyǵa «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý», «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baptary boıynsha aıyp taǵylyp jatyr.
