Aqtóbede Alash qaıratkerlerine berilgen kóshelerdiń qashan jóndeletini belgisiz

AQTÓBE. Qazaqparat - Táýelsizdiktiń 25 jyldyǵyna oraı Aqtóbe qalasynda 25 kósheniń ataýy ózgerdi. Qalanyń eski bóligindegi kóshelerge Alash ardaqtylarynyń esimi berilgen. Tuıyq, uzaq jyldar boıy jóndelmegen ekinshi deńgeıli kósheler Mustafa Shoqaı, Álıhan Bókeıhan, Muqaǵalı Maqataev, Sáken Seıfýllın men Qaırat Rysqulbekov syndy qaıratkerlerdiń attarymen ataldy. Biraq qalalyq ákimdik eski kóshelerdi jóndeý jumystaryn josparǵa engizbegen, dep habarlaıdy QazAqparat tilshisi.

Aqtóbe qalasyndaǵy Parıj kommýnasy - Shákárim Qudaıberdiuly, Zınchenko - Mirjaqyp Dýlatov, Krasnoşekov - Beıimbet Maılın, Krasnaıa - Sáken Seıfýllın, Chapaev - Іlııas Jansúgirov, Mırzoıan - Oraz Táteuly, 1905 jyl - Qaırat Rysqulbekov bolyp ózgerdi. Sonymen qatar, Muhamedjan Tynyshpaev, Muqaǵalı Maqataev , Álkeı Marǵulan, Ámire Qashaýbaev, Ábýbákir Kerderi, Jansha Dosmuhameduly, Ózbekáli Jánibekovke kóshe ataýy berildi. Bári tuıyq, qalanyń eski bóligindegi ekinshi deńgeıli kósheler. Bul kóshelerdiń joldary 40-50 jyl boıy jóndeý kórmegen, oı-shuńqyry kóp. Táýelsizdiktiń 25 jyldyǵyna oraı kóshe ataýyn ózgertken Aqtóbe qalasynyń ákimdigi kóshelerdi atyna saı qaıta jóndeýdi óz mindetine almaı otyr.
«Ataý bergen durys baǵyt, durys jumys dep oılaımyn. Ataý bergennen keıin mindetti túrde jóndeý júrgizýimiz qajet degen mindetteme alǵan joqpyz. Joldar qala kósheleriniń jaǵdaıyna baılanysty jóndeledi. Keıbir kóshelerden kúnine 10-15 mashına ótedi, keıbirin kúndelikti paıdalanamyz, qoǵamdyq kólik júredi. Jol jóndeý jumysyn josparlaǵanda qoǵamdyq kólik júretin kóshelerge basymdyq beriledi», - dedi Aqtóbe qalasy ákiminiń birinshi orynbasary Jandos Baıyrhanov.
Aıta keteıik, Aqtóbe qalasynda bıyl 17 nysan jóndeledi. 11 shaqyrym joldy retke keltirýge 1,2 mıllıard teńge bólingen. Sonyń ishinde 14 kóshege kúrdeli jóndeý jasalyp, úsh kóshege tasjol tóseledi.