Aqtóbede alaman báıge ótti
Týrnır Aqtóbe oblysy ákimdiginiń qoldaýymen, QR Ulttyq sport qaýymdastyǵy men «Báıge» federatsııasynyń uıymdastyrýmen ótti.
Jarysty tamashalaýǵa elimizdiń túkpir-túkpirinen báıge jankúıerleri, Aqtóbe oblysynyń ákimi Eraly Toǵjanov pen QR Ulttyq sport qaýymdastyǵynyń prezıdenti Islambek Saljanov jáne QR Májilis depýtattary Amanjol Áltaev pen Qazybek Álishev qatysty.
Sharada sóz alǵan Aqtóbe oblysynyń ákimi Eraly Toǵjanov óńirdegi ulttyq sporttyń damý kórsetkishine toqtaldy.
«Óńirimizde ulttyq sport túri Báıge sporttyn damytýǵa, salaýatty ómir saltyn nasıhattaýǵa barlyq jaǵdaılar jasalǵan.
Búgingi tańda oblysta Aqtóbe oblysynyń turǵyndarynyń dene shynyqtyrý jáne sportpen shuǵyldaný múmkindigi úshin 1 954 sport nysany bar. 2023 jyldyń aıaǵyna deıin 19 sport keshenin turǵyzý josparymyzda bar.
Oblysymyzda ulttyq sport túrlerimen shuǵyldanatyn sportshylar sany – 26 720 adam.
Aqtóbe oblysy osy úrdistiń aıasynda ulttyq sportty, onyń ishinde at sportyn damytý baǵytynda birqatar jumystar júrgizilýde.
2005 jyly at sporty mektebi ashylyp, odan beri Ulttyq sport túrleri boıynsha mamandandyrylǵan sport mektebi bolyp qaıta quryldy. Onda kókpar, aýdaryspaq, teńge ilý, qazaq kúresi, toǵyzqumalaq bólimsheleri jumys isteıdi. Qazirgi tańda 400-diń ústinde balalarymyz osy mektepte jattyǵýda. Ol balalarmen 24 joǵary dárejeli jattyqtyrýshy mamandar jumys isteýde» dedi Eraly Toǵjanov.
Sondaı-aq, saltanatty sharada QR Ulttyq sport qaýymdastyǵynyń prezıdenti Islambek Saljanov bul jarysty keler jyly Qazaqstanda ótetin Dúnıejúzilik Kóshpendiler oıyndaryna daıyndyq ekendigin jetkizdi.
«Ulttyq sport Memleket basshysy Qasym-Jomart Kemelulynyń erekshe nazarynda.
Kelesi jyly elimiz Dúnıejúzilik Kóshpendiler oıynyn ótkizedi. Bul barshamyzǵa úlken – mártebe!
Biz álem halyqtaryna ózimizdiń ulttyq sporttarymyzdy, ádet-ǵuryptarymyz ben mádenıetimizdi keńinen dáripteýimiz kerek.
Búgingi jarysymyz sol álemdik dodaǵa daıyndyq.
Osynaý báıgeni uıymdastyrýǵa qoldaý bildirgen Aqtóbe oblysynyń ákimi Eraly Luqpanulyna úlken alǵysymdy bildiremin!
Sondaı-aq, QR Májilisiniń depýtattary Amanjol Áltaev pen Qazybek Álishevke, «Báıge» federatsııasynyń prezıdenti Qanat Kópbaevqa jáne de osyndaǵy uıymdastyrýǵa atsalysqan barsha azamattarǵa Ulttyq sport qaýymdastyǵynyń atynan alǵys aıtamyn!» dedi Islambek Saljanov.
Aıta keteıik, týrnırge elimizdiń birneshe óńirinen 62 shabandoz qatysyp, «Qunan báıge», «Top báıge», «Alaman báıge» boıynsha saıysqa tústi.
Jeńimpazdarǵa baǵaly jáne qarjylaı júldeler tabystaldy.
Sonymen qatar, kórermender «Ulttyq kıim» baıqaýyn da tamashalap tarqasty.
