Aqtóbede áli qansha aýylda mobıldi ınternet joq
AQTÓBE. KAZINFORM — Óńirde 37 aýyl mobıldi ınternetke qosylmaǵan. Bul eldi mekender spýtnıktik júıeni qoldanyp otyr.
Aqtóbe oblystyq tsıfrlyq tehnologııalar basqarmasynyń habarlaýynsha, óńirdegi 311 aýyldyń 274-inde mobıldi ınternet bar. Bıyl Elek, Aqsý, Baıjankól jáne Dmıtrıevka aýyldarynda da qosylady.
— Byltyr 24 shaǵyn eldi mekenge OneWeb spýtnıktik júıesi jetkizildi. Nátıjesinde aýyl halqynyń ınternetpen qamtylýy 98,8% jetti. 2026 jyldyń sońyna deıin taǵy 8 aýyldy qosyp, qamtý kórsetkishin 99,6%-ǵa jetkizý jospary bar. Respýblıkalyq mańyzy bar avtomobıl joldarynyń boıynda 17 antenno-machtalyq qurylys salý josparlandy. Investor anyqtalyp, qujattar tapsyryldy, — dedi Aqtóbe oblystyq tsıfrlyq tehnologııalar basqarmasynyń basshysy Áset Otarbaev.
Onyń aıtýynsha, barlyq aýylǵa mobıldi ınternet qosý múmkin emes. Sebebi baılanys operatorlary halyq sany az aýyldarǵa qarjy bólmeıdi.
— Baılanys operatorlary shaǵyn aýylǵa, 50 adam turatyn eldi mekenge barmaıdy. Biraq Wi-Fi qosylady. Qazir ınternetsiz otyrǵan aýyl joq, — dedi ol.
Aıta keteıik, qazir Aqtóbe qalasy men 7 eldi mekende 5G jelisi qosylǵan. Barlyǵy 112 5G bazalyq stantsııasy jumys isteıdi. Jyl sońyna deıin Shalqar qalasynda bir bazalyq stantsııa iske qosylady. Sonymen birge «Qoljetimdi ınternet» ulttyq jobasy aıasynda 2026–2027 jyldary aralyǵynda 172 eldi mekenge talshyqty-optıkalyq baılanys jelisin júrgizý jáne 38 aýyldy spýtnıktik ınternetpen qamtý josparlanǵan.
Eske salsaq, Arys qalasy Dermene aýyldyq okrýgine qarasty Sanaly aýylynyń turǵyndary ınternet baılanysynyń joqtyǵyna alańdap otyr. Bul másele ásirese mektep oqýshylaryna qıyndyq týǵyzyp otyr.
