Aqtóbede ál-Farabıdiń 1150 jyldyǵyna arnalǵan shara ótti

AQTÓBE. QazAqparat - Aqtóbedegi Dostyq úıinde Shyǵystyń Arıstoteli atanǵan ǵulamanyń 1150 jyldyǵyna arnalǵan «Ál-Farabı jáne qazirgi zaman» atty áýendi-tanymdyq is-sharasy ótti, dep habarlaıdy QazAqparat Aqtóbe oblysy ákimdiginiń «Qoǵamdyq kelisim» kommýnaldyq memlekettik mekemesine silteme jasap.

Atalmysh shara dúnıejúzilik ǵylym men mádenıette kórnekti iz qaldyrǵan uly tulǵa, ortaǵasyrlyq oıshyl Ábý Nasyr ál-Farabıdiń 1150 jyldyǵyn keńinen atap ótý jáne onyń ómiri men shyǵarmalaryn etnos ókilderine tanystyrý maqsatynda uıymdastyryldy.

Farabı ómir súrgen dáýirge aparǵan áýendi - tanymdyq keshke oblystyq QHA hatshylyǵy, «Aqtóbe oblysy ákiminiń apparaty», Qoǵamdyq kelisim» kommýnaldyq memlekettik mekemesiniń qyzmetkerleri, etnomádenı birlestikterdiń tóraǵalary men ókilderi, Analar keńesiniń músheleri, RF Orynbor oblysyndaǵy qazaq dıasporasynyń ókilderi, Aqtóbe qalasynyń oqý oryndarynyń stýdentteri, S.Báıishev atyndaǵy oblystyq ámbebap ǵylymı kitaphanasynyń qyzmetkerleri, №6655 áskerı bóliminiń sarbazdary qatysty.

«Ál-Farabı rýhymen tildesý» atty teatrlandyrylǵan qoıylymmen bastalǵan sharada Aqtóbe joǵary polıtehnıkalyq kolledjiniń stýdentteri men «Qoǵamdyq kelisim» KMM mamandary mýzyka teorıtegi ál-Farabıdiń obrazyn somdap, osy arqyly babamyzdyń ǵylym men bilimniń qupııa syrlaryn jetik meńgergeni úshin keıingi urpaqqa óshpes ónege, asyl mura, qaıtalanbas qazyna qaldyrǵanyn taǵy bir eske túsirdi.

Odan ári, merekelik sharaǵa saltanatty bastaý berý úshin sóz kezegi oblystyq QHA hatshylyǵynyń meńgerýshisi Marjan Qorǵanbaevaǵa berildi. Hatshylyq meńgerýshisi Dostyq úıiniń tórine jınalǵan kóremender men qatysýshylardy quttyqtaı kele, Shyǵystan shyqqan kórnekti oıshyl ál-Farabıdiń álem tanyǵan tulǵa ekendigin atap ótti. Sondaı-aq, RF-nyń Orynbor oblysynda turatyn qazaq dıasporasynyń ókilderi aqtóbelikterdi quttyqtaı kele, ál-Farabıdiń Shyǵys Azııa men túrki halyqtary úshin ańyz adam, qaıtalanbas tulǵa ekendigin aıtyp ótti.

Іs-shara barysynda ál-Farabıdiń mýzyka janryn zerttegen zertteýshi ekendigi de aıtylyp, A.Jubanov atyndaǵy Aqtóbe mýzykalyq kolledjiniń stýdentterinen qurylǵan etnoansambldiń baǵdarlamasymen jalǵasty.

Budan soń, Batys pen Shyǵysty tereń bilimimen bas ıdirgen Farabı týraly «Velıkıı ál-Farabı» derekti fılmi kórermenderdiń nazaryna usynyldy.

Іs-sharada S.Báıishev atyndaǵy oblystyq ámbebap ǵylymı kitaphanasy «Ál-Farabı – ǵıbratty ǵalym» taqyrybynda kórme uıymdastyryp, ǵulamanyń ǵumyry men júrip ótken jolyn zerttegen ǵalymdardyń kitaptary tamashalandy.

Qalamyzdaǵy túrli etnos ókilderi men jastardyń basyn qosqan shara kórermenderdiń qoshemetine bólengen ýkraındardyń «Oksana» halyqtyq horynyń oryndaýyndaǵy «Aqtóbe valsi» ánimen aıaqtaldy.