Aqtóbede áli de suıytylǵan gaz tapshy
AQTÓBE. KAZINFORM – Aqtóbe qalasynda suıytylǵan gaz talon arqyly satylyp jatyr. Jergilikti zaýyttar bólgen gaz azdyq etip, bir bóligi Shymkentten tasymaldanatyn boldy.
QR Energetıka mınıstrligi qazan aıynda Aqtóbe oblysyna 10 282 tonna suıytylǵan gaz bóldi. 1-14 qazan aralyǵynda óńirdegi gaz quıý beketterine 4 824 tonna gaz jetkizildi. Bul bólingen suıytylǵan gazdyń 47% teń.
— Búginde jergilikti zaýattar avtotasymal arqyly 366 tonna gaz jóneltti. Onyń 112 tonnasy «SNPS-Aqtóbemunaıgaz» AQ-y, 115 tonnasy «QazaqOıl-Aqtóbe» JShS-i, 139 tonnasyn «Gas Processing Company» JShS-i bóldi. Qazirgi kezde gaz quıý beketterinde kólik kezegi bar. Bul jaǵdaı óńirge bólingen suıytylǵan gaz kóleminiń az bolýynan týyndap otyr. Negizi oblysqa aı saıyn 16 myń tonna gaz kerek. Qazan aıynda bólingeni ádettegiden 30% az, — dedi Aqtóbe oblystyq kásipkerlik basqarmasynyń basshysy Almas Salyqbaev.
Aqtóbe oblysy ákimdigi suıytylǵan gaz kólemi jetkiliksiz ekenin aıtyp, QR Energetıka mınıstrligimen kelisim júrgizdi. Sóıtip «SNPS-Aqtóbemunaıgaz» AQ-nan 972 tonna, Shymkent qalasyndaǵy «Petro Qazaqstan Oıl Prodakts» JShS-niń zaýytynan 864 tonna suıytylǵan gaz bólindi.
— Qazirgi ýaqytta jóneltý jáne jetkizý jumystary qalypty rejımde iske asyp jatyr. Osyǵan baılanysty oblys turǵyndarynan atalǵan jaǵdaıǵa túsinistik tanytýdy suraımyz, — dedi Almas Salyqbaev. Onyń aıtýynsha, Atyraý munaı óńdeý zaýytyndaǵy jóndeý jumystary kezinde Aqtóbeden Aqtaýǵa gaz bólindi. Suıytylǵan gazdy «SNPS-Aqtóbemunaıgaz» AQ-y jóneltti. Beketterdegi jumysshylardyń aıtýynsha, suıytylǵan gaz jetkizilgen kezde kezek kóbeıedi. Ol kezde kez kelgen adam satyp ala alady. Al rezervýarda gaz kólemi azaıǵan kezde tek talon arqyly satýǵa shyǵarylady.
Eske salsaq, bıyl shilde, qyrkúıek aıynda da Aqtóbede gaz tapshylyǵy sezildi. Gaz quıý beketterinde kezek kóbeıip, kóbinde talon arqyly satty.