Aqtóbede áli de 18 kásiporyn jumysy toqtap tur
AQTÓBE. KAZINFORM – Qazirgi kezde onyń altaýy satyldy, ekeýiniń quryltaıshysy ózgerdi. Ózgelerine ınvestor tabylmady. Kazinform saýalyna Aqtóbe oblystyq kásipkerlik jáne ındýstrııalyq-ınnovatsııalyq damý basqarmasy jaýap berdi.
Aqtóbe oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Dosjan Álibekov óńirlik kommýnıkatsııalar qyzmetinde jyldy qorytyndylap, bıylǵy jospardy aıtty. Byltyr Aqtóbede ekonomıkasyna 1,2 trln teńge, bıyl qańtar aıynda 88 mlrd teńge ınvestıtsııa tartyldy. Soǵan qaramastan óńirde áli kúnge deıin 18 kásiporynnyń qyzmeti toqtap tur. Onyń 6-y Aqtóbe qalasynda, 12-si aýdandarda.
- Bul kásiporyndar sút ónimderin óndirý, ónerkásip, saýda, kókónis ósirý, sondaı-aq qubyrlar men fıtıngter óndirý sııaqty túrli salalarda jumys istegen. Qazirgi ýaqytta 6 kásiporyn satyldy, 2 kásiporyn menshik ıeleriniń basqarýynda qaldy. Qalǵan kásiporyndarǵa ınvestorlardy nemese satyp alýshylardy izdeý jumystary jalǵasyp jatyr, - dep habarlady Aqtóbe oblystyq kásipkerlik jáne ındýstrııalyq-ınnovatsııalyq damý basqarmasy.
Atap aıtqanda Aqtóbe qalasyndaǵy qubyr men fıtıng shyǵaratyn zaýyt satyldy. Zaýyttyń jańa ıesi batys óńirindegi kópir qurylysyna qajetti materıal shyǵarýdy josparlap otyr. Al shyny talshyqty qubyrlar óndirisin satyp alǵan seriktestik nysandy jalǵa berýdi josparlanyp qoıǵan. Ortalyqtaǵy saýda úıi jumysyn toqtatqan soń satylyp, búginde jalǵa berilgen. Sonymen birge Aqtóbe qalasynda qyzanaq pen qııar ósiretin jylyjaı satylyp ketti. Jańa ıesi ony qaıta iske qosýdy josparlap otyr. Toqyma buıymdaryn shyǵaratyn «Edemı» JShS-i de jobany jandandyrmaq. Al «ANDI» JShS-niń taýarly sút fermasyn satyp alýshy áli tabylmady.
- Alǵa aýdanyndaǵy «Aqtóbe Drilling Service» JShS-ne tıesili kóbikti beton bloktaryn óndirý zaýytyn «Alǵa Holdıng» JShS 90 mln teńgege satyp aldy. Jańa ıeleri tósenish óndirisin iske qosýdy josparlap otyr. Al «Indýstrııa qaptamasy» JShS polıpropılen qaptaryn óndirý tsehyn 162 mln teńgege satý nemese aıyna 2 mln teńgege jalǵa berýdi josparlaǵan. Bul aýdanda «Aqqus» JShS-niń qus eti óndirisi dep toqtap tur. Joba týraly usynys QR Ózbekstandaǵy Elshiligine jáne «Kazakh Invest» UK» AQ-ǵa joldandy. Mártók aýdanynda «Dııar Holdıng» JShS-ne tıesili qoı terisinen ton ónimderin shyǵaratyn tseh ǵımaraty satyldy. «Zan Asia» JShS bul jerde mashına jasaý zaýytyn iske qosýdy josparlap otyr. Al «Alǵabas» JShS-niń sút ónimderi men jartylaı fabrıkattar óndirisine áli de ınvestor nemese satyp alýshy izdestirilip jatyr. Sonymen birge bul aýdanda «Optima Capital» JShS ılengen bylǵary óndirisi toqtap tur. Eksporttyq taýar óndirisine sheteldik ınvestor izdestirilip jatyr, - dep habarlady Aqtóbe oblystyq kásipkerlik jáne ındýstrııalyq-ınnovatsııalyq damý basqarmasy.
Hromtaý aýdanyndaǵy «Eýrazııalyq joba 2» JShS-ne tıesili elevator kesheni toqtap tur. Keshen sot arqyly ekinshi deńgeıli bank menshigine ótken. Bank 850 mln teńgege satýdy josparlap otyr. Sonymen birge Qarǵaly aýdanyndaǵy «Badamsha nıkel zaýyty» JShS-niń kobalt-nıkel kenderi, Shalqar aýdanyndaǵy «JBI-30» JShS-niń temirbeton buıymdary óndirisine satyp alýshy tabylmady. Al Temir aýdanyndaǵy «SNPS-Aqtóbemunaıgaz» AQ-nyń «Jaqsymaı» óndiristik bazasy, Muǵaljar aýdanyndaǵy «Oktıabr» óndiristik bazasyn ǵımarattarymen birge satý josparlandy. Bul jumysty kompanııa men Aqtóbe oblysynyń ákimdigi birge qolǵa alǵan. Qazirgi ýaqytta ınvestorlardy belsendi izdeý, sondaı-aq satylǵan birqatar kásiporynnyń jumysyn qaıta jandandyrý jumysy júrgizilip jatyr. Kóbi ınfraqurylym tartýdy nemese qarjylaı qoldaý kórsetýdi suraıdy.
Osydan eki jyl buryn Aqtóbe oblysynda 19 kásiporynnyń jumysy toqtap turǵany týraly jazyldy. Arada eki jyl ótkende Áıteke bı aýdanyndaǵy katodty mys pen mys kontsentratyn óndirý zaýyty ǵana qaıta iske qosylǵan. Byltyr munda qazba jáne óndirý jumystary bastaldy.