Aqtóbede akvapark pen jaǵajaı jumysyna ruqsat berildi

AQTÓBE. QazAqparat – Aqtóbe oblysynda karantın shekteýi jeńildedi. Akvaparkter men jaǵajaılar jumysyna ruqsat berildi, dep habarlaıdy QazAqparat tilshisi.

Aqtóbe oblysynyń bas sanıtar dárigeri jańa qaýly shyǵardy. Qaýlyda ashyq aýadaǵy akvaparkterdiń qyzmetine ruqsat berilgen.

«Jaǵajaılar jumysyn bastaı alady. Sonymen birge betperde taǵý, áleýmettik ara qashyqty saqtaý rejımin ustanǵan kınoteatrlar da kelýshilerge qyzmet kórsetedi. Ata-analardyń ótinishi boıynsha jazǵy mektepter jumys isteıdi. Tek synyptaǵy bala sany 15-ten aspaýy tıis», - dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.

Sondaı-aq túngi jáne oıyn klýbtary, qorqor (onyń ishinde qoǵamdyq tamaqtaný oryndary janyndaǵy) býkmeker keńseler men lotoreıa klýbtary, lotoreıa satatyn ózge de oryndar jumysyna shekteý bar. Bul nysandar tek Ashyq jobasy aıasynda jumys isteı alady.