Aqtóbede aqtútek boranda jolda qalǵandar qutqaryldy
AQTÓBE. QazAqparat - Aqtóbede boran kezinde joldar jabylyp, kólikter qar qursaýynda qaldy. Qutqarýshylarǵa barlyq baǵyttan shaqyrý tústi, dep habarlaıdy QazAqparat tilshisi.
22 qańtar kúni saǵat 17:15-de tótenshe jaǵdaılar qyzmetine alǵashqy qońyraý tústi. Aqtóbe - Orsk tasjolynda 21 jeńil kólik qar qursaýynda qaldy. Evakýatsııa jumystaryna tótenshe jaǵdaılar basqarmasynan 3 qyzmetker men 1 tehnıka jiberildi. Jolǵa jaýapty merdigerler de bar. Saǵat 18: 50-de avtokólikter jolaýshylarymen birge shyǵarylyp, Qarǵaly aýdanynyń Batamsha aýdandyq ortalyǵyna jetkizildi.
«Qosestek aýyly mańynda 40 avtokólik turyp qalǵan. Barlyǵy 100 jolaýshy mektep pen dámhanaǵa ornalastyryldy. Sonymen qatar, aýa raıynyń nasharlaýyna baılanysty Álimbet orta mektebine reseılikter jetkizildi. Al Aqtóbe - Atyraý tasjolynyń Muǵaljar aýdany aýmaǵynda 70 avtokólik qar qursaýynda qalǵany týraly habarlama kelip tústi. Barlyǵy 54 avtokólik shyǵarylyp, 165 adam, onyń ishinde 28 bala evakýatsııalandy. Olar jarystan kele jatqan bolýy múmkin. Shalqar aýdanynyń Bozoı, Taldyq, Shetyrǵyz aýyldarynda da qutqarý jumystary júrgizildi», - dep habarlady oblystyq TJD baspasóz qyzmeti.
Samara - Shymkent tasjolynyń Hromtaý aýdany mańynda Qyzǵyzstan azamattaryna kómek berildi.
«Samara - Shymkent tasjolynyń Oıyl aýyly mańynda 2 GAZel avtokóligi qar qursaýynda qalyp qoıǵandyǵy týraly habarlama kelip tústi. Oqıǵa ornyna tehnıka men qutqarýshylar jiberildi. Nátıjesinde 23 adam qaýipsiz jerge, ıaǵnı, Oıyl kentine kóshirildi. Jalpy túnde 58 kólik qardan shyǵarylyp, 172 adam qutqaryldy. Al, 113 adam jylytý pýnkterine evakýatsııalandy», - dep habarlady oblystyq TJD baspasóz qyzmeti.
