«Aqtóbe – tarynyń astanasy» atty aýqymdy gastrofestıval ótedi

Kelýshi qonaqtardy tańǵy 11:00-den bastap ulttyq rýh pen hosh ıiske toly atmosfera kútpek. Kúni boıy jalǵasatyn mereke keshki 17:00-ge deıin Aqtóbeniń agrarlyq dástúri men zamanaýı gastronomııalyq múmkindigin toǵystyrady.

Sonymen qatar, «Ánim sensiń – Aqtóbe» etnofestıvali de merekeniń kórkin asha túsedi.

Festıval alańynda tarydan ázirlengen 50-den astam taǵam túri usynylady. Dástúrli ulttyq as máziri jármeńkesi, shokoladty jent daıyndaý sheberlik saǵaty, ystyq baýyrsaq pen samaýryn shaıynyń hosh ıisi – bári de kelgen qonaqqa erekshe áser syılaıdy.

Oıyl aýdanynyń sheberleri taryny óńdeýdiń kóne tásilderin kózben kórip, qolmen sezinýge múmkindik beredi. Al qolóner sheberleriniń buıymdary – teri, kıiz, aǵash, jún jáne zergerlik ónerdiń zamanaýı úılesimin kórsetetin naǵyz mádenı kórme bolmaq.

Sondaı-aq, festıval aıasynda «Aqtóbe – tarynyń astanasy» atty ashyq dóńgelek ústel ótedi. Munda sala mamandary men sarapshylar tary ósirý dástúrin jańǵyrtý, onyń taǵamdyq qundylyǵyn keńinen nasıhattaý jáne óńirdiń agrarlyq-gastronomııalyq áleýetin damytý baǵyttaryn talqylaıdy.

Kirý tegin.