Aqtóbede aqtalyp shyqpaq bolǵan burynǵy qala ákimi alaıaqqa aldanyp qaldy
AQTÓBE. KAZINFORM — Shalqar qalasynyń eks-ákimi zańgerlik kómek almaq bolyp, 4 mln teńgesinen aıyryldy. Ol 2021 jyly Qylmystyq kodekstiń «Salǵyrttyq» baby boıynsha aıypty dep tanylyp, 4 jylǵa bas bostandyǵynan shekteý jazasyna kesilgen bolatyn.
Qylmystyq is № 2 Aqtóbe qalalyq sotynda qaraldy. Qylmystyq kodekstiń «Alaıaqtyq» baby boıynsha T. Aqbota men S. Qalamqasqa aıyp taǵyldy. Olar birneshe adamdy aldap, aqsha jymqyrǵan. Barlyǵy 7 epızodtyń biri Shalqar qalasynyń burynǵy ákimine qatysty boldy.
Sot kabınetindegi is materıalyna súıensek, sottalýshy S.Qalamqas Aqtóbe oblysy zańgerler palatasynda zańger bola júrip Shalqar qalasynyń eks-ákimine quqyqtyq keńes berýge, kómektesýge ýáde etedi. Ol 2021 jyly Qylmystyq kodekstiń «Salǵyrttyq» baby boıynsha aıyptalyp, 4 jylǵa bas bostandyǵynan shekteý jazasyna kesilgen. 2022 jyly tamyz aıynda ekeýi kezdesip, kelisedi. Shyn máninde zańger óziniń qorǵaýshy bola almaıtynyn bilse de aldap, sendiredi. Qyzmeti úshin 8 mln teńge surap, alǵashqy jarnasyna 4 mln teńge alady. Eks-ákim bir kúnnen soń kelisimmen 4 000 000 teńgeni aparyp beredi, arada eshqandaı da kelisimshart jasalmaıdy.
Sondaı-aq sottalýshy T. Aqbota men S. Qalamqas 2021 jyly «Samuryq-Qazyna» AQ-nyń memlekettik baǵdarlama arqyly arendalyq páter beretinin estip, paıda tabýdy kózdeıdi. Olar Almaty, Astana jáne Aqtóbe qalalarynan páter alǵysy kelip júrgen adamdardy izdeıdi. Olarǵa «Edelveıs», «Haıvıl», «Terra», «Batys Premıým», «Altaır» «Mıllenıým» turǵyn úı keshenderinen páter alý úshin kezekke turǵyzýǵa ýáde etip, aqsha alyp otyrǵan.
Sot úkimimen T.Aqbota aıypty dep talynyp, 6 jylǵa bas bostandyǵynan aıyryldy. Alaıda kámelet jasqa tolmaǵan balasy bar sottalýshy jazasyn úsh jyldan soń óteıdi. S.Qalamqas aıypty dep tanylyp, 6 jylǵa bas bostandyǵynan aıyryldy. Sot jábirlenýshilerdiń azamattyq talap aryzyn ishinara qanaǵattandyrdy. Sonyń ishinde sottalýshy S.Qalamqas Shalqar qalasynyń eks-ákimine 4 mln teńgeni qaıtarýǵa tıis.
Sot úkimi zańdy kúshine engen joq.
Buǵan deıin habarlaǵanymyzdaı, Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy.
