Aqtóbede aqsha men altyn buıymdar salynǵan seıf tabyldy

AQTÓBE. QazAqparat – Aqtóbede urlyq jasap, aqsha men altyn buıymdar salynǵan seıfti alyp ketken kúdiktiler ustaldy. Olar urlanǵan zatty jasyrǵan jerin kórsetti, dep habarlaıdy QazAqparat tilshisi.

Bıyl jaz aıynda Aqtóbe qalasyndaǵy kópqabatty úıdiń birinshi qabatynda ornalasqan páterlerdiń birinde zergerlik buıymdar men aqshasy bar seıf urlandy. Aqtóbe qalalyq polıtsııa basqarmasynyń qyzmetkerleri izdestirý jumystaryn júrgizip, kúdiktilerdi anyqtap, ustady. Tintý kezinde olardyń biriniń úıiniń aýlasyna kómilgen seıf tabyldy.

«Úsh kúdikti ustaldy. Qylmystyq kodekstiń «Urlyq» baby boıynsha sotqa deıingi tergeý jumysy júrgizilip jatyr. Osy baptyń sanktsııasynda múlki tárkilenip, 7 jylǵa deıin bas bostandyǵynan aıyrý jazasy kózdelgen. Kúdiktiler ýaqytsha ustaý ızolıatoryna qamaldy», - dedi oblystyq PD baspasóz qyzmetiniń jetekshisi Erbolat Sarqulov.