Aqtóbede ákimdik jarty ǵasyr buryn salynǵan úıdiń qıraǵaly turǵanynan beıhabar
AQTÓBE. KAZINFORM — Qaladaǵy Týrgenev kóshesinde ornalasqan № 2 úıdiń shatyry ushyp, tóbesi opyrylyp tur. Turǵyndary ákimdikke shaǵym aıtyp barǵanymen, bul nysan apatty úılerdiń tiziminde joq bolyp shyqty.
Eki qabatty úı 1964 jyly salynǵan. Sodan beri úı kúrdeli jóndeý kórmeı, búginde shatyr jabyndysynyń keıbiri ushyp ketip, jańbyrda sý ishke aǵatyn kúıge tústi. Qasbetindegi kirpish te tininen ajyrap, qulaıyn dep tur. Munda páter ıeleri kooperatıvi de, basqarýshy da joq.
— Úı apatty jaǵdaıda tur. Bul úıdiń adamdary 10 jyl buryn qujat tapsyryp, ákimdikten jaýap kútip júr. Ózimiz jyl saıyn retke keltirip, shatyr jabyndysyn da salamyz. Biraq qatty jelde ushyp kete beredi. Biraq úıdiń kúıi, jaǵdaıy nasharlap bara jatyr. Kireberistegi qabyrǵalary jarylyp, tóbesi de qulaǵaly tur, — dedi qala turǵyny Ǵalymjan Isataev.
Al 2015 jyldan beri osy úıde turatyn Erbolat Hamzınniń aıtýynsha, olar kóktem men kúzde qınalady. Jańbyr jaýǵanda, qar erigende sýdan zardap shegedi.
— Munda áý basta ystyq sý qubyry tartylmaǵan. Sýdy jylytyp paıdalanamyz. Taıaýda elektr togynan ot shyǵyp, ózimiz sóndirdik. Úı aǵashtan salynǵan soń ekinshi qabatta turatyn turǵyn sýǵa túsip jatqan jerinen birinshi qabatqa qulaǵan. Ol vannasymen birge birinshi qabatqa túsip, aýrýhanada em aldy. Jyl saıyn ákimdikke aıtamyz, jazamyz, biraq kómek bolmady, — dedi ol.
Aqtóbe qalalyq turǵyn úı ınspektsııasynyń basshysy Aqnur Qazbaevanyń aıtýynsha, Aqtóbe qalasy Týrgenev № 2 mekenjaıyndaǵy úı apatty dep tanylmaǵan.
— Turǵyndar qalalyq turǵyn úı ınspektsııasyna kelýi tıis. Jınalys ótkizip, tehnıkalyq qorytyndy berilýi kerek. Arnaıy mamandar úıdi qarap, akt jasaıdy. Eger úı apatty dep tanylsa, turǵyn úı qoryna muqtaj azamat retinde kezekke turady. Al eger kúrdeli jóndeýge jarasa, memlekettik baǵdarlama túsindiriledi. Turǵyndarǵa 0,1% ústemeaqymen aqsha berilip, jóndeý jasalady, — dedi Aqnur Qazbaeva.
Aıta keteıik, Aqtóbe qalasynda apatty dep tanylǵan 28 kópqabatty úı bar. Buǵan deıin habarlaǵanymyzdaı, Aqtóbede apatty dep tanylǵan jańa úıdegi páterlerdi banktegi kepilden shyǵarý qıynǵa soǵyp tur. Eset batyr turǵyn alabyndaǵy bes qabatty eki úıdiń biri ǵana memlekettik mekeme balansyna ótti.