Aqtóbede ákimdik pen polıgondy senimgerlik basqarýǵa alǵan merdiger sottaspaq
AQTÓBE. KAZINFORM — Bıyl Aqtóbeniń polıgonyn senimgerlik basqarýǵa alǵan «Taza Álem 12» JShS qoqys shyǵarýshylardy da, ákimdikti de sotqa bermek. Ol buǵan deıin tasymaldaýshylardyń kelisimshartqa otyrmaǵanyn, 1 teńge de tólemegenin, birneshe aı ótse de ótinishke qulaq aspaǵanyn aıtyp otyr. Kazinform tilshisi taraptardyń pikirin tyńdady.
Úsh aıda 1 teńge de almadym — merdiger
Aqtóbe qalasy ákimdigi turmystyq qatty qaldyq polıgonyn bıyl senimgerlik basqarýǵa berdi. Memlekettik satyp alý konkýrsyna qatysqan «Taza Álem 12» JShS jumysty shilde aıynda bastady. Alaıda sol kezden-aq kedergige tap bolǵan.
— Qabyldaý-ótkizý aktisin berý kezinen-aq problema boldy. 20 kún kire almaı júrdik polıgonǵa. Al ereje boıynsha úsh kúnnen keıin qabyldaý-ótkizý jumystary júrýi tıis. Sóıtip qoqys polıgonyn 3 jylǵa senimgerlik basqarýǵa aldym. Úsh aıǵa synaq merzimi berildi. Ákimdik men kompanııa kelisimshartqa qol qoıǵannan keıin qoqys tasymaldaıtyn kompanııalar kelýi tıis emes pe? Alaıda qansha ýaqyt ótse de bul jumys atqarylmady, olar kelisimshart jasamady. 1 teńge de tólemedi. Ákelgen qoqysty tegin qabyldap, tegistep, nyǵyzdap, jaıyp otyrdyq. Bir kúni kólikterdi toqtatyp, «basshylar baılanysqa shyqsyn, kelisimshartqa otyramyz» desek, kásipkerdiń ózi emes, bizge qala ákimi, qala ákiminiń orynbasary Juldyzbek Bısembın, turǵyn úı-kommýnaldyq sharýashylyq bóliminiń basshysy, qyzmetkerleri habarlasady. «Kirgize bershi, jınalys jasaımyz, sol jerde sheshiledi» dep aıtady. Biz kelistik. Sol erteńmen júrdik osylaı, — dedi «Taza Álem 12» JShS dırektory Álibek Sereshov.
Onyń aıtýynsha, qazir qala ákimdigine qarasty «ATK Qyzmet» JShS — 16 mln teńge, «NEO PLUS» JShS — 16 mln teńge, «Taza Qarǵaly» JK — 2 mln teńgeden astam qaryz.
Al «Aqjol LTD» JShS men polıgon merdigeri tehnıkalyq qyzmet kórsetý kelisimine kelgen.
Qajet kezde júk kólikterin berýge kelisken soń órt shyqqanda járdemdesken.
— Polıgondy senimgerlik basqarýǵa alǵan kezde bizge birneshe talap qoıyldy. Onyń ishinde qoqysty ýaqytyly kómý, tógisteý, órtke qarsy kúres jumystaryn júrgizý, suryptaý talaptary bar. Al sol jumysty ýaqytyly atqarý úshin bizge de kiris qajet. Qazirgi kezde kúnine 500-700 tonna qoqys jetkiziledi. Ár tonnasy 1926 teńgege qabyldanýy tıis. Negizi qoqys tasymaldaıtyndar 2023 jyly tarıfti eki ese kótergen. Al qabyldaý quny sol kúıi ózgermegen. 2022 jylǵy tarıf búginge deıin 1926 teńge bolyp tur. Konkýrs kezinde halyqtan aqshany qoqys shyǵarýshy jınaıdy, biraq polıgonǵa eshkim tólemeıdi dep jazsa, eshkim qatyspas edi. Mysaly ózimiz de qatyspas edik, kelisimshartqa qol qoımas edik. Ol suraqqa jaýap joq. Qala ákimi baılanysqa shyqpady. Endi qoqysty polıgon janyna tógip jatyr, — dedi Álibek Sereshov.
Merdiger úsh mekemeden aqsha óndirý úshin sotqa shaǵym túsirmek. Sonymen birge Aqtóbe qalasy ákimdiginiń kelisimshartty birjaqty úzý sheshimine kelispeı otyr.
Bul suraqty da sot arqyly sheshýdi josparlap qoıdy.
— Aqtóbeniń ákimshiligi, qalanyń ákimshiligi birinshi kúnnen bastap kedergi jasaýmen boldy. Kelisimshartqa otyrǵannan keıin úsh kúnde qabyldaý-ótkizý aktisin jasap, kásipkerge berilýi kerek. Olar bir aıǵa sozdy, — dedi merdiger.
Senimgerlik basqarýǵa alǵan kompanııa kelisimshart talaptaryn oryndaǵan joq — ákimdik
Aqtóbe qalasy ákimdiginiń baspasóz qyzmeti kelisimsharttyń úzilgenin habarlady. Sebep — merdiger talapty oryndamady.
— Qalalyq qoqys polıgony shilde aıynda «Taza álem 12» JShS-ne senimgerlik basqarýǵa beriledi. Úsh aı synaq merzimi. Synaq merzimi ishinde kompanııa kelisimshart talaptaryn oryndaǵan joq. Onyń biri osy órttiń aldyn alý jáne saldarymen kúresý sharalary bolatyn. Ol talap oryndalǵan joq. Órt bolǵan kezde jáne odan keıin de qalanyń tótenshe jaǵdaı qurylymdary men kommýnaldyq qyzmetteri tartyldy. Qalalyq TÚKSh bólimi 29-qazanda kelisimshartty úzip, polıgondy «Taza álem 12» JShS-niń senimgerlik basqarýynan qaıtardy. Qazirgi ýaqytta turmystyq qatty qaldyqtar polıgony aýmaǵynda bolǵan órtten keıin órttiń aldyn alý jáne jerdi rekýltıvatsııalaý jumysy júrgizilip jatyr. Sonymen qatar, buryn shyǵarylǵan qaldyqtardy tegisteý jáne jabý sharalary atqarylyp jatyr, — deıdi Aqtóbe qalasy ákiminiń baspasóz qyzmeti.
Al qoqys shyǵarýshy men polıgonǵa ıelik etken kompanııa arasyndaǵy kelisimshartty ózara sheshýi tıis.
Alaıda «ATK Qyzmet» JShS qala ákimdigine tıesili kommýnaldyq mekeme bolsa da bul jumys atqarylmaǵan.
«ATK Qyzmet» JShS-niń dırektory Dastan Hamıtov kelisimshartqa qol qoımaǵanyn rastady. Sebebin Aqtóbe qalasy ákiminiń baspasóz hatshysy aıtatynyn jetkizdi.
— 2025 jyldyń shilde aıynda qatty turmystyq qaldyqtar polıgonyn senimgerlik basqarýǵa alǵan «Taza álem 12» JShS kelisimshartty qujat júzinde bergen joq. Qyzmetin paıdalaný tarapqa qyzmet kórsetýshi taraptan kelisimshartqa turý jóninde resmı usynys berilmegen, — dep jazdy Aqtóbe qalasy ákiminiń baspasóz hatshysy Aıgúl Baımenova.
Qoqysty polıgonnan tys jerge tógý jaıyn suraǵanda bul jer de Aqtóbe qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine tıesili dep túsindirdi.
— Turmystyq qatty qaldyqtar polıgony aýmaǵynda órt boldy. Sodan keıin órttiń aldyn alý jáne jerdi rekýltıvatsııa jumystary júrip jatyr. Osyǵan baılanysty memlekettik mekemege tıesili jer ýchaskesin ýaqytsha paıdalaný jóninde sheshim qabyldandy. Bul da — polıgonǵa arnalǵan aýmaq. Qazirgi polıgon keńeıtiledi, sebebi bolashaqta qoqys syımaıdy, — dedi Aıgúl Baımenova.
Aqtóbe oblystyq ekologııa departamentiniń habarlaýynsha, qoqys polıgonynan tys jerge turmystyq qaldyq tógý deregi tirkelgen, tekserý júrgizý úshin qujattar daıyndalyp jatyr.
Eske salsaq, Aqtóbede keshe ǵana qoqys polıgony órtendi. Órt aýmaǵy 1 myń sharshy metrge jetti.