Aqtóbede ákimdik pen garaj ıeleri ortaq kelisimge kele almady
AQTÓBE. KAZINFORM — Qala ákimdigi garaj ornalasqan jerdi memleket menshigine alyp, jol salmaq. Al garaj ıeleri qalanyń bas josparyn jasaǵan kezde munyń bári aldyn ala eskerilýi tıis dep otyr.
Aqtóbe qalasy Sáńkibaı batyr dańǵyly boıynda ornalasqan garaj ıeleri qala ákimi Azamat Beketpen kezdesti. Kezdesýde garaj ıeleri múlikke tıispeýdi surady.
— Byltyr jalpy jınalys bolyp, ákimdik bas josparǵa ózgertý engizý úshin usynys jasalatynyn aıtty. Eger usynysty qanaǵattandyrmasa qaıtadan jınalys jasap, ony halyqqa aıtýy kerek edi. Biraq búginge deıin aıtylmady. Bul zańsyz. Men garajdy berýge qarsymyn. Altyn orda shaǵyn aýdanynyń qurylysy bastalǵan kezde jeke múlik turǵanyn kórmedi me? — dedi qala turǵyny Rústem Hamzın.
Aqtóbe qalasy ákimdigi qazirgi kezde 60 garajdy memleket menshigine qaıtaryp, keıin bul jumysty jalǵastyrmaq. Aldaǵy ýaqytta taǵy 300 garaj ornalasqan jer qaıtarylady.
— Bul jerdegi 4,5 gektar aýmaqty alyp, 2 myń oryndyq mektep salýdy josparlaımyz. Bári bas josparǵa sáıkes atqarylyp jatyr. Bas jospar 2021 jyldan beri bastap ózgertildi. Ony bir jylda bekitpeıdi. Kem degende 3 jylda túrli mınıstrlikten ótedi. Saraptamadan ótip, QR Premer-mınıstri qol qoıady. Usynystar kóp boldy, biraq onyń ótkeni de, qabyldanbaǵany da bar, — dedi Aqtóbe qalasynyń ákimi Azamat Beket.
Jıynda taraptar ortaq mámilege kele almady. Ákimdik bas josparǵa saı jumys jalǵastyrmaq. Al garaj ıeleri múlikti bergisi kelmeıdi.
Aıta keteıik, Aqtóbede ákimdik pen polıgondy senimgerlik basqarýǵa alǵan merdiger sottaspaq. Sebebi tasymaldaýshylar kelisimshartqa otyrmaǵanyn. Onyń ishinde ákimdikke qarasty kommýnaldyq mekeme de bar.