Aqtóbede ákimdik ǵımaratynyń shatyry janǵanda úsh órt sóndirýshi týdy alyp shyqty

Aqtóbe oblysy ákimdiginiń ǵımaratynan órt shyqqanda sóndirý jumystarymen qatar týdy ýaqytyly sheshý tapsyrmasy berildi. Bul tapsyrmashy № 4 órt sóndirý bóliminiń úsh qyzmetkeri oryndady.

— Basshylyqtan memlekettik týdy sheshý, oǵan órt tıgizbeý týraly buıryq tústi. Bólimnen bir bólimshe, onyń ishinde azamattyq qorǵaý starshınasy Erjan Týrtaev, azamattyq qorǵaý serjanty Aıbolat Dáýrenbaı, órt sóndirýshi Jandos Qazbaev baryp, týdy sheship alyp keldi. Úsh qyzmetker batyldyǵyn tanytyp, tóbege shyqty. Biz ony TJD bastyǵyna tabystadyq. Basshy oblys ákimine berdi. Sheship alý 10-15 mın ýaqyt aldy, — dedi Aqtóbe qalasy TJB № 4 órt sóndirý bóliminiń bastyǵy Salamat Nurqalyq.

Onyń aıtýynsha, keshe saǵat 20:21–de oblystyq ákimdiktiń tóbesi janyp jatqany týraly habarlama tústi. Saǵat 20:22–de № 4 órt sóndirý bóliminen úsh tehnıka, 12 adam dereý jóneltildi. Al saǵat 20:26–da kezekshi Amanǵalı Ýmeshov órt ornyna jetti.

— Oblystyq ákimdik bolǵasyn jerde joǵary rangti shaqyrtý dep sanalady. Jeke quram durys sheshim qabyldap, durys áreket jasaı bilgenniń nátıjesinde sol jerden óttiń tolyq taralýyna jol bermedi. Barǵan kezde Eltańdanyń dál ústińgi jaǵy, týdyń asty qatty janyp jatty. Qaı jerden bastalǵanyn naqty aıta almaımyn. Óıtkeni biz barǵanda aldyńǵy bóligi, buryshy, sheti janyp jatty, — dedi Salamat Nurqalyq.

Eske salsaq, keshe keshkilik Aqtóbe oblystyq ákimdigi ǵımaratynan órt shyqty. Órt aýdany 300 sharshy metrdi qurady. Eshkim zardap shekken joq. Oqıǵa ornynda jedel shtab quryldy. Búgin Aqtóbe oblysy ákimdigi qashyqtan jumys isteıdi. Qazirgi kezde polıtsııa qyzmetkerleri ákimdik ǵımaratyn qorshaýǵa alǵan. Órt elektr togynyń qysqa tuıyqtalýynan bolýy múmkin. Aldyn ala aıtylǵan boljam osy.