Aqtóbede ákimdik aldynda drıft jasaǵan júrgizýshige aıyppul salyndy
AQTÓBE. KAZINFORM — Júrgizýshi Oıyl aýdany ákimdigi ǵımaratynyń aldynda qaýipti manevr jasap, qoǵamdyq tártipti buzǵandy. Tranzıttik nómiri bar avtokólik aıyp turaǵyna qoıylyp, júrgizýshige aıyppul salyndy.
Aqtóbe oblystyq PD baspasóz qyzmetiniń habarlaýynsha, jolda qaýipti manevr jasap, qoǵamdyq tártipti buzǵan júrgizýshi Oıyl aýdandyq polıtsııa bólimine jetkizildi. Aqtóbe qalasynyń 24 jastaǵy turǵyny aýylǵa barǵan soń ákimdik ǵımaratynyń aldynda drıft jasap, ákimshilik jaýapqa tartyldy.
— Júrgizýshi BMW markaly avtokóliginiń dóńgelekterin aınaldyryp, short burylyp, qaýip tóndirgen. Daýysy jergilikti turǵyndardyń narazylyǵyn týdyrdy jáne azamattardyń tynyshtyǵyn buzdy. Polıtsııa qyzmetkerleri quqyq buzýshyny jedel túrde anyqtady. Ol Aqtóbe qalasynyń 2002 jyly týǵan turǵyny bolyp shyqty. Quqyq buzýshynyń tranzıttik memlekettik nómiri bar avtokóligi tárkilenip, aýdandyq polıtsııa bóliminiń aýlasyndaǵy mamandandyrylǵan aıyp turaǵyna qoıyldy. Júrgizýshige qatysty Ákimshilik quqyq buzýshylyq týraly kodeksiniń 434-baby 1-bóligi («Usaq buzaqylyq»-red.) boıynsha ákimshilik hattama toltyryldy. Sot sheshimimen jas jigitke 86 myń tengeden astam ákimshilik aıyppul salyndy, — dep habarlady Aqtóbe oblystyq PD baspasóz qyzmeti.
Aıta keteıik, jyl basynan beri jolda drıft jasaǵan 372 júrgizýshi jaýapqa tartyldy. Astanada drıft jasaǵan júrgizýshi 10 táýlikke ákimshilik qamaqqa alyndy. Almatyda qala jolynda drıft jasaǵan júrgizýshi 5 táýlikke qamalyp, avtokólik arnaıy turaqqa qoıyldy.
